Այսօր «Տնտեսական օրակարգ» ֆորումի ժամանակ, որը տեղի է ունենում կառավարության ընդունելությունների տանը, վարչապետ Հովիկ Աբրահամյանն անդրադարձավ այս օրերին ՀԷՑ-ի շուրջ առաջացած խնդիրներին: Վարչապետն ասաց, որ Հայաստանի էլեկտրական ցանցերը մեծ պարտքեր է կուտակել:
Հիշեցնելով Հանրային ծառայությունները կարգավորող հանձնաժողովի որոշումը էլեկտրաէներգիան թանկացնելու մասին, ըստ որի՝ օգոստոսի 1-ից սպառողները էլեկտրաէներգիայի համար կվճարեն ավելի թանկ, ինչը բողոքի ալիք էր բարձրացրել, վարչապետն ասաց, որ այս հարցը կարեւոր խնդիրներից է:
«Մենք ամեն ինչ պետք է անենք այս ոլորտը ֆինանսապես առողջացնելու համար եւ դրա համար անհրաժեշտ է հանրության աջակցությունը: Մենք քայլեր ենք իրականացնում միջազգային փորձագետների մասնակցությամբ հասարակությունում առկա անջրպետը վերացնելու համար»,- ասաց վարչապետը:
Նա նաեւ ասաց, որ իրենց գործընկերների՝ Համաշխարհային բանկի եւ Միջազգային զարգացման գործակալության հետ էլեկտրաէներգետիկայի ոլորտի 2016-2036թթ. ռազմավարության ծրագիր են մշակել, որը շուտով կդրվի մասնագիտական եւ հանրային քննարկման. «Վստահ եմ, որ այն հնարավորություն կտա բարձրացնելու վստահությունը կայուն եւ վստահելի էներգետիկ համակարգ ունենալու մեր հնարավորությունը»:
Կարդացեք նաև
Լուսինե ԲՈՒԴԱՂՅԱՆ
