Ռուսաստանի ԱԳՆ-ն աշխատանքային կապեր է պահպանում արցախյան հակամարտության կողմերի հետ: Այս մասին նախօրեին կայացած ճեպազրույցին հայտարարել է գերատեսչության մամուլի խոսնակ Մարիա Զախարովան՝ մեկնաբանելով հայ-ադրբեջանական հակամարտ զորքերի շփման գծում վերջին օրերի լարվածությունը:
«Դուք գիտեք մեր սկզբունքային դիրքորոշումը, որն ուղղված է Ղարաբաղի շուրջ իրավիճակի կարգավորմանը բացառապես խաղաղ միջոցներով: Մենք հավատարիմ ենք այդ սկզբունքային դիրքորոշմանը, որը նաև ամրագրված է փաստաթղթերով»,-հավելել է նա:
Զախարովային խնդրել են մեկնաբանել նաև Թուրքիայի նախագահ Ռեջեփ Թայիփ Էրդողանի՝ Իսլամաբադում Տնտեսական համագործակցության կազմակերպության գագաթաժողովին արած հայտարարությունը, որով նա կոչ է արել մուսուլմանական աշխարհին միավորվել Հայաստանի դեմ: Պատասխանելով հարցին՝ արդյոք ԵԱՀԿ համանախագահները, այդ թվում՝ Ռուսաստանը, կարձագանքե՞ն Թուրքիայի նախագահի այն հայտարարությանը, որ անհրաժեշտ է միավորել ջանքերը «ադրբեջանական տարածքների օկուպացիայի» և Հայաստանի դեմ, որով հերթական անգամ փորձ է արվել հակամարտությանը հաղորդել կրոնական ենթատեքստ, ինչը հակասում է ՄԽ դիրքորոշմանը, Զախարովան ասել է, որ ինքը «հավելելու ոչինչ չունի»:
«Կարծում եմ՝ Դուք ինքներդ ամեն ինչ մեկնաբանեցիք։ Դուք ասացիք, թե ինչ է հայտարարել թուրքական կողմն, ու ինչպիսին է Մինսկի խմբի դիրքորոշումը։ Անկեղծ ասած՝ այստեղ հավելելու բան չկա։ Մենք լիովին հանձնառու ենք ղարաբաղյան կարգավորման հարցում մեր դիրքորոշմանը՝ որպես երկիր և որպես Մինսկի խմբի համանախագահ»,-հավելել է նա:
Կարդացեք նաև
Պատրաստեց՝ Վիկտորյա ԱՆԴՐԵԱՍՅԱՆԸ