Aravot.am-ը ԵՊՀ հայ բանասիրության ֆակուլտետի դեկան Արծրուն Ավագյանին խնդրեց մեկնաբանել ԿԳՄՍ նախարարի տեղակալ Նարինե Թուխիկյանի այն արտահայտությունը, երբ ժամանակին Լեւոն Մկրտչյանն էր նախարարը, հենց ԵՊՀ բանասիրական ֆակուլտետից դուրս եկավ այն արտահայտությունը` ի՞նչ վատ է, թող ռուսերենը երկրորդ պետական լեզու լինի, ինչո՞ւ բանասիրականի ուսանողությունն այդ ժամանակ բողոքի գործողությունների չդիմեց:
Հիշեցնենք, որ ժամանակին նման պնդում արել էր Երեւանի պետական համալսարանի հայ բանասիրության ֆակուլտետի դեկան, բանասիրական գիտությունների դոկտոր, պրոֆեսոր Արծրուն Ավագյանը. «Ամեն մի լեզու, որ հնարավոր է սովորի որեւէ երկրի ժողովուրդ, խրախուսելի է: Ցավոք, մենք այնպիսի օրերում ենք ապրում, որ դժվար է դարձել լեզու սովորելը: Եվ, եթե Ռուսաստանն այդպիսի նախաձեռնություն է հանդես բերում, խրախուսելի է, որ դրա հոգը տանի ոչ թե լոկ որպես հանձնարարական, այլ որոշակի նյութական միջոցներ ներդնի, ուսուցման գործընթաց կազմակերպի: Այդտեղ ես ոչ մի վատ բան չեմ տեսնում: Մանավանդ որ հիմա մեր բնակչության մի մասը «անգլիական թեքում» է ստացել, ամեն գնով ուզում է սովորել, բայց նվազ թվով մարդիկ են, որ այդ հնարավորությունն ունեն:
Մինչդեռ որեւէ լեզու անպայման անհրաժեշտ է, որ ժողովրդի մեծ մասը տիրապետի, եւ դա իմ պատկերացմամբ կարող է ռուսերենը լինել, ինչը կօգնի մեզ շփվելու համաշխարհային գիտության, կրթության, գրականության եւ առհասարակ այն տեղաշարժերի հետ, որոնք կատարվում են մշակութային կյանքում: Հետեւաբար, դրանից չպիտի խուսափել, ինչ-որ պիտակ կպցնել, թե եթե երկրորդ պետական լեզու է, ապա առաջին պետական լեզուն անտեսվում է: Ես դա միանգամայն դրական եմ ընդունում, մանավանդ որ մեր տնտեսական եւ, այսպես ասած, ռազմական բազում խնդիրներով մենք կապված ենք Ռուսաստանի հետ»:
Այժմ Արծուն Ավագյանն «Առավոտին» ասաց. «Ես չգիտեմ` ով ինչու էր բողոքում ու ինչու չէր բողոքում, բայց ես հիմա էլ այն կարծիքի եմ, որ առհասարակ մեր կրթական համակարգում երկրորդ օտար լեզու պետք է լինի պարտադիր: Դա անգլերեն կլինի, ռուսերեն, իսպաներեն, ֆրանսերեն, թե գերմաներեն, ես չգիտեմ, բայց վստահ եմ, որ մեկ օտար լեզու պետք է, որպեսզի մեր երիտասարդները կարողանան շփվել համաշխարհային մշակույթի, կրթության, գիտության եւ այլ ոլորտների հետ: Դա իմ կարծիքն է, իսկ մնացածի համար ես չեմ կարող պատասխան տալ»:
Կարդացեք նաև
Գոհար ՀԱԿՈԲՅԱՆ
