«Եթե մեր տնտեսությունում ինչ-որ բան կա, որն ինձ չափազանց մտահոգում է, դա կապիտալ ծախսերի թերակատարումն է»,-այս մասին այսօր լրագրողների հետ հանդիպմանն ասաց ԿԲ նախագահ Մարտին Գալստյանը։ Նա մանրամասնեց՝ պետությունը պետք է ունակ լինի իրականացնելու որակյալ կապիտալ ներդրումներ. «Դա հնարավորություն կտա ոչ միայն պոտենցիալը բերել այն մակարդակին, որը կար մինչ համավարակն ու պատերազմը, այլ նաեւ էականորեն դրական կազդի մասնավոր հատվածի շահութաբերության վրա»։
Պարոն Գալստյանը ավելի պատկերավոր ներկայացրեց իրավիճակը՝ կապիտալ ծախսերի ճիշտ եւ ժամանակին կատարման դեպքում․ «Պատկերացրեք, որ կա ինչ-որ տնտեսություն, որը գտնվում է մի հատվածում, որտեղ ճանապարհ չկա, ու այդտեղ պետությունը ճանապարհ, ջրագիծ է անցկացնում, եւ դա այն հատվածն է, որտեղ խաղողագործությունը կարող է զարգանալ։ Պետության այդ կապիտալ ծախսերով՝ ճանապարհ կամ ենթակառուցվածքներ ստեղծելով, հնարավորություն է ստեղծվում, որպեսզի մասնավորը զբաղվի զբոսաշրջությամբ, խաղողագործությամբ, գինեգործությամբ»։
Անդրադառնալով տնտեսության վարկավորմանը, պարոն Գալստյանը նշեց՝ տնտեսության այն ճյուղերն են քիչ վարկավորել, որոնք կորոնավիրուսի համավարակից ամենաշատ հարվածներն են ստացել։ Նա ասաց նաեւ, որ սպառողական վարկավորման որոշակի նվազում է գրանցվել։ Սակայն, ըստ ԿԲ-ի, նախորդ տարի վարկային պորտֆելն, ընդհանուր առմամբ, աճել է, ինչը պետական աջակցության ծրագրերի արդյունք է, այսինքն, պետությունը մոտ 160 մլրդ դրամի աջակցության ծրագրեր է իրականացրել, որոնց զգալի մասը բանկային համակարգի միջոցով է կատարվել՝ վարկերի ձեւով։
Պարոն Գալստյանը նշեց՝ ԿԲ կանխատեսումներով այս տարի տնտեսական աճը 2% կլինի։
Կարդացեք նաև
Նելլի ԲԱԲԱՅԱՆ
