Acronis ընկերության եւ «Հայաստանի զարգացման նախաձեռնություններ» (IDeA) հիմնադրամի հրավերով երեքօրյա այցով Հայաստանում գտնվող շախմատի աշխարհի չեմպիոն Մագնուս Կարլսենն երեկ Լեւոն Արոնյանի հետ այցելել էր Տաթեւ:
Վերադառնալուց հետո շախմատի երկու հսկաները հանդիպեցին լրագրողների հետ:
Acronis-ի գլխավոր տնօրեն Սերգեյ Բելոուսովը նշեց, որ թեեւ Մագնուս Կարլսենին ներկայացնելու հարկ չկա, այդուհանդերձ ընդգծեց, որ մինչեւ Կարլսենը աշխարհին ամենից հայտնի նորվեգացին մեծ մարդասեր Ֆրիտյոֆ Նանսենն էր, սակայն Մագնուսը շրջանցել է նրան ու նա է հիմա ամենաճանաչված նորվեգացին: Բելոուսովը ընդգծեց նաեւ, որ երկուսն էլ հայ ժողովրդի բարեկամներն են ու այսօրվա այցով՝ արդեն երկուսն էլ եղել են Հայաստանում:
Կարլսենը հիացած է Տաթեւի Վանքով, տպավորված՝ Հայաստանի բնությունով, որն իրեն իր հայրենիք Նորվեգիան է հիշեցնում, մարդկանցով եւ որ ամենակարեւորն է՝ շախմատի նկատմամբ Հայաստանում եղած մեծ հետաքրքրությամբ ու լուրջ վերաբերմունքով: Չեմպիոնի խոսքերով դա եզակի եւ ընդօրինակման արժանի երեւույթ է:
Խոսելով աշխարհի թագի համար Վիշվանաթան Անանդի հետ երկրորդ մրցամարտի, որում արդեն ինքը պետք է պաշտպանի չեմպիոնի կոչումը, Կարլսենն ասաց, որ ինքը խաղալու է այն թեկնածուի հետ, որը հաղթել է հավակնորդների մրցաշարում եւ որ ինքը չի թերագնահատում Անանդին:
Կարդացեք նաև
Կարլսենը հիշեց նաեւ Լեւոն Արոնյանի հետ իր առաջին շախմատային հանդիպումը, որում հայ գրոսմայստերը հաղթեց այն ժամանակ տակավին պատանիին եւ որ դա իրեն «կոտրել էր»:
Հարցին, թե արդյո՞ք կոմպյուտերային շախմատը մի օր ասպարեզից չի հանի մարդկային շախմատը, Կարլսենը պատասխանեց. «Դեռ Ալյոխինի ու Կապաբլանկայի ժամանակներում էին խոսու, թե շախմատը մեռնում է: Բայց ինչպես տեսնում եք, շախմատը կա, զարգանում է եւ մարդու գործոնն այս խաղում երբեք չի վերանա»:
Լեւոն Արոնյանն իր հերթին պատասխանելով, թե առաջիկա համաշխարհային օլիմպիադայում Հայաստանի հավաքականն ի՞նչ նպատակներ է դրել իր առջեւ, ասաց. «Դուք գիտեք, որ մենք միշտ էլ մեր առջեւ հաղթելու նպատակ ենք դնում: Չեմ կարող խոստանալ, որ անպայման հաղթելու ենք: Բայց մի բան հաստատ է՝ դրա համար պայքարելու ենք»:
Հայաստանի լավագույն շախմատիստն ընդամենը տասը օր է մնալու Հայաստանում: Նա այս ընթացքում ուզում է հանգստանալ, որպեսզի դրանից հետո նախապատրաստվի գալիք կարեւորագույն մեկնարկներին:
Աշոտ ՀԱԿՈԲՅԱՆ
