Վիտամինային դիմակը հրաշալի կերպով խոնավացնում է դեմքի մաշկը, հարթեցնում կնճիռները եւ կանխում դրանց առաջացումը։ Մեկ լիքը գդալ պաստերիզացված կաթնաշոռին խառնեք մի քանի գդալ կիտրոնահյութ կամ մանր կտրտած նարինջ։
Հաղարջից պատրաստված դիմակը նեղացնում է ծակոտիները եւ գլխավորապես խորհուրդ է տրվում ճարպոտ մաշկի դեպքում։ Ճզմեք մի քանի հատ սեւ եւ սպիտակ հաղարջ, հյութին խառնեք 1 գդալ կարտոֆիլի օսլա, ստացված խյուսը քսեք դեմքին։
Թանով դիմակը թարմացնում, հանգստացնում եւ հարթեցնում է ցանկացած մաշկ։ Թարմ թանը խառնեք տալկի (սպիտակ կամ կանաչավուն փափուկ շերտավոր հանք, որ օգտագործվում է տեխնիկայում եւ բժշկության մեջ) հետ եւ ստացված խյուսը բավականին հաստ շերտով քսեք դեմքին։ Մեղրաձվով պատրաստված րոպեական դիմակը թարմացնող է։ Թարմ դեղնուցը հարեք փոքր քանակությամբ բնական մեղրի հետ եւ տափակ վրձնով քսեք դեմքին եւ վզին։
Քիչ քանակությամբ կաթով եփած մեկ հատ մեծ կարտոֆիլից պատրաստած դիմակը դեմքից անմիջապես վերացնում է հոգնածության հետքերը եւ հարթեցնում կնճիռները: Երբ ստացված ջրիկ խյուսը սառչի, այն քսեք դեմքին:
Պատրաստեց ԱՆՈՒՇ ՄԱԹԵՎՈՍՅԱՆԸ
«Առավոտ» օրաթերթ
13.06.2015
