«Մենք անկուսակցական ենք, բայց քաղաքական լուսանցքից դուրս չենք, ուրախ ենք, շնորհակալ են, որ հրավեր ստացանք ու անկախ պատգամավորների խումբը, մարդիկ, ովքեր իրենց ընտրատարածքներում բավական հեղինակություն ունեն, կարող են մասնակցել գործընթացներին»,- Aravot.am-ի հետ զրույցում ասաց ԱԺ պատգամավոր Արագած Ախոյանը: Հիշեցնենք, նախկին ԲՀԿ-ականները, ովքեր ոչ պաշտոնապես, անկախ պատգամավորական խումբ են ստեղծել, այսօր նախագահ Սերժ Սարգսյանի մոտ քննարկել են սահմանադրական բարեփոխումների նախագիծը:
Որ իրենք կան, գոյություն ունեն եւ չեն կարող ու չեն ուզում քաղաքական լուսանցքում հայտնվել`իրենք, նախկին ԲՀԿ-ական պատգամավորները դեռ մի քանի ամիս առաջ էին նախագահին տեղեկացրել`հանդիպելով ու զրուցելով նրա հետ:
Անկախ պատգամավորները մի քանի առաջարկ են ներկայացրել`ընտանիքի կառուցվածքի հստակ ձեւակերպման, կրոնական հավասարությունների, այլ դավանանքների, ՏԻՄ-երի ընտրությունների կարգի, սփյուռքահայ երիտասարդների` կամավոր հիմքերով հայկական բանակում ծառայության հնարավորության մասին եւ այլն:
«Ստացանք սպառիչ պատասխան`հայ ընտանիքը կազմված է կնոջից եւ տղամարդուց»,-ասաց Արագած Ախոյանը`հավելելով. «Նորմալ էր, սպառիչ պատասխաններ ստացանք»: Սփյուռքահայերի՝ հայկական բանակում ծառայելու հնարավորություն, պարզվում է այսօր էլ կա, եթե նրանք ՀՀ քաղաքացիություն ընդունեն:
Կարդացեք նաև
Պատգամավորական խմբի անդամները, ովքեր հիմնականում մեծամասնական ընտրակարգով ընտրված պատգամավորներ են, նախագահի հետ հանդիպման ժամանակ մտահոգություն չեն հայտնել նախագծի`100 տոկոսանոց համամասնական ընտրակարգին անցնելու դրույթի վերաբերյալ: «Ռեյտինգային ընտրության կետը կա, նույն հեղինակություն ունեցող մարդը կարող է ընդգրկվել ցանկացած կուսակցության մեջ եւ իր ռեյտինգով էլի ձայներ հավաքել նաեւ կուսակցության համար»,- պարզաբանեց Արագած Ախոյանը:
Արագած Ախոյանից հետաքրքրվեցինք`իրենց չի՞ կաշկանդում այն հանգամանքը, որ Սերժ Սարգսյանի հետ հանդիպման գնացող ուժերին ու գործիչներին, պիտակավորում են: «Այդ պիտակավորողներին ես համարում եմ, որ չեն սիրում իրենց հայրենիքը: Այլ նպատակ ու տողատակ ունեն: Հայրենիք սիրող մարդը չի կարող նախագահի հետ հանդիպողներին պիտակավորել: Նախագահը ընդունում եւ լսում է բոլորին, մենք արժեւորված ենք, արհամարհված լինելով չեմ կարծում, որ մեզ ավելի լավ կզգայինք»:
Նելլի ԳՐԻԳՈՐՅԱՆ
