Գրող, կինոսցենարիստ ՎԱՀԱՆ ՏԵՐ-ՂԱԶԱՐՅԱՆԻՆ հիացնում է մեր ժողովրդի կազմակերպվածությունը: Նրա խոսքով՝ հայ ժողովուրդն ամբողջ աշխարհին ապացուցեց, որ ինքը մի գծաչափ բարձր է իր պահվածքով ու բարոյական չափանիշների նշագծերով:
-Հեղափոխական շարժումներից հետո, որպես կանոն, հիասթափություն ենք ապրել, հիմա չկա՞ նման վտանգ:
-Հիասթափության վտանգը կախված է միասնականությունից, եթե ժողովուրդը չի ուզում սպանվել, չի սպանվի, եթե ժողովուրդը չի ուզում հիասթափվել, չի հիասթափվի:
Ես սկզբից տեսա երկու բլոկներ՝ բացարձակ ոստիկանական բռնապետություն և մյուս կողմից՝ ամբոխավարություն` իր ամենաբացարձակ տեսքով: Ինչպես միշտ է լինում հեղափոխությունների ժամանակ, ամբոխավարությունը հաղթեց: Թող ոչ ոք ինձնից չնեղանա, ես գրողի խոսք եմ ասում ու պատմություն լավ իմացող մարդու, թե սա ինչպես կշարունակվի, ինչ այլափոխությունների, ձևափոխությունների կամ կատարելագործությունների կենթարկվի, կախված է արդեն… Շատ լավ է, որ հիմա շատ բան կախված է ժողովրդից:
-Ո՞ւմ եք տեսնում երկրի ղեկավարի պաշտոնում:
-Ամենակարևորը կադրային քաղաքականությունն է. մարդը պետք է լինի իր ճիշտ տեղում, ոչ մի քայլ վերև, ոչ մի քայլ ներքև, հակառակ դեպքում՝ եթե կադրային քաղաքականությունը սխալ լինի, մենք կկանգնեք նույն կոտրած տաշտակի առաջ: Անպայման կհայտնվեն զանազան դուրսպրծուկներ, զանազան ստոր մարդիկ, պատեհապաշտներ ու դուրս կմղեն ազնիվ մարդկանց ու մասնագետների: Մեզ անհրաժեշտ են բոլոր տեղերում մասնագետներ, երկրի ղեկավարն էլ պետք է լինի մասնագետ, իր գործի մասնագետ:
-Կա՞ այդպիսի մեկը:
-Այդպիսի մարդկանց ժամանակն է ընտրում: Հայ ժողովրդի արգանդը չի չորացել, իսկ երիտասարդական շարժումը ցույց տվեց, որ այդ արգանդը, Սևակի բառերով, դարձել է ավելի բեղուն:
Արմինե ՍԱՐԳՍՅԱՆ
Հարցազրույցն ամբողջությամբ՝ «Իրատես» թերթի այսօրվա համարում
