«Մոտ ժամանակներս Ղարաբաղի հարցով զարգացումները շատերիս աչքերը շատ բանում կբացեն»,- այսօր «Հենարան» մամուլի ակումբում նման հայտարարություն արեց քաղաքագետ, «Սասնա ծռերի» նախընտրական ցուցակի երկրորդ հորիզոնականը զբաղեցնող Ստեփան Գրիգորյանը: Aravot.am-ը քաղաքագետից հետաքրքրվել էր`նախընտրական շրջանում շատ խոսվեց Արցախի հարցում հնարավոր զարգացումներից. դրանք ընդամենը նախընտրական շահարկումնե՞ր էին, թե առաջիկայում հնարավոր են վտանգավոր զարգացումներ: «Այն դիմադրությունը, որը կար, որը ես զգացի իմ մաշկի վրա, ինձ կասկածելու տեղիք է տալիս, որ Ղարաբաղի հարցով զարգացումներ են լինելու: Քանի որ «Սասնա ծռերի» մոտեցումը էականորեն տարբերվում է մյուս բոլոր ուժերի մոտեցումներից, կարծում եմ, այդ պատճառով էլ բոլորը դիմադրում էին «Սասնա ծռերին»,- ասաց քաղաքագետը` նկատելով, որ տարածքների վերադարձի հարցը, ՌԴ-ի շահերը, Ադրբեջանի հետ հարաբերությունները շատ հրատապ են այժմ:
Այլ մանրամասները`տեսանյութում
Անդրադառնալով ընտրությունների արդյունքներին, քաղաքագետն ասաց` խորհրդարանական համակարգի համար բնական է, որ վարչապետն ունի բացարձակ մեծամասնություն, բայց անբնական է, որ ընդդիմություն չունենք: Նկատում է, եթե ԲՀԿ-ն եւ ԼՀԿ-ն կոալիցիա չկազմեն, ձեւական առումով ընդդիմություն կլինեն, բայց իրականում այս խորհրդարանում մենք ընդդիմություն չենք ունենա:
Հարցին`ինչո՞ւ «Սասնա ծռերը» չանցան խորհրդարան, մինչդեռ հավակնում էին երկրորդ ուժը լինել, Ստեփան Գրիգորյանը պատասխանեց. «Հանդիպումների ժամանակ մարդիկ ասում էին`մենք ձեր կողմնակիցն ենք, բայց հեղափոխությունը չի ավարտվել, մենք պետք է ձայն տանք Նիկոլ Փաշինյանին, որ կայունություն լինի: Ես հասկանում եմ, քանի որ մենք կայունությունն ընկալում ենք հենց այդպես`մարդն, ում հավատում են, շատ ձայն ստանա»:
«Սասնա ծռերի»`անհրաժեշտ շեմը չհաղթահարելու հարցում, ըստ Ստեփան Գրիգորյանի, մեծ դեր խաղաց նաեւ իշխանության`իր վարկանիշը բարձրացնելու լծակները`ձերբակալություններ, հակակոռուպցիոն պայքար եւ այլն:
Նաեւ, իր կարծիքով, էական դերակատարում է ունեցել նաեւ վարկանիշային ընտրակարգը, որը նախկին իշխանությունը փաթաթեց բոլորի գլխին ու ինքն էլ այս ընտրությունում, դարձավ դրա զոհը: Նա կարծում է, որ ՀՅԴ-ին եւ ՀՀԿ-ին էլ վարկանիշային ընտրակարգը խանգարեց, որպեսզի չհաղթահարեն շեմը:
Քաղաքագետը նաեւ կարծում է, որ «Սասնա ծռերի» նկատմամբ լրատվամիջոցների հակաքարոզչություն կար, մի բան, որը չկար այլ ուժերի դեմ: Ասում է`դա իր մեջ սուբյեկտիվ տարր է պարունակում, պետք է վերլուծել: Չի բացառում, որ մտավախություն կար, որ ԱԺ-ում կարող էին հայրենասերներ հայտնվել:
Ինքը սպասում էր, որ ՀՀԿ-ն կանցնի խորհրդարան: Կարծում է, որ ՀՀԿ-ն լուրջ քաղաքականություն ընտրեց`սեւի ու սպիտակի ու իշխանությունները ավտոմատ գնացին այդ պայքարին, դա ավելացրեց ՀՀԿ-ի ձայները, եթե ռեյտինգային ընտրակարգը չլիներ, միգուցե կանցներ:
Իսկ ՀՅԴ-ի մասով զարմացած է, քանի որ Երեւանի ավագանու ընտրություններում, մեկից քիչ ավելի տոկոս ձայն ստացան, իսկ այժմ 3-ից ավելի. «Այդ ֆենոմենը դեռ պետք է հասկանալ»: Ամեն դեպքում, «Սասնա ծռերի» պարագայում, 23 հազար ձայն հավաքելը կուսակցության համար, որը գրանցվեց նոյեմբերի 8-ին, առանց կառույցների, միայն համախոհների թիմով մասնակցեց ընտրապայքարին, քաղաքագետը վատ ցուցանիշ չի համարում:
Ստեփան Գրիգորյանը ընտրություններին մասնակցության թիվը ցածր չի համարում: Նա կարծում է, որ այս ընտրություններին մասնակցեց այնքան մարդ, որքան նախկինում, պարզապես նախկին իշխանությունները մանիպուլյացիաների տարբերակներով, ցուցակներ էին ուռճացնում:
Հետագա հնարավոր զարգացումների, արտաքին եւ ներքին մարտահրավերների մասով բանախոսը հստակ կարծիք կձեւավորի կառավարության ձեւավորումից հետո: Ձեռնպահ է մնում նաեւ կանխատեսումներից`այս խորհրդարանի կյանքի տեւողության մասով. «Լավ է, որ ԱԺ-ն լեգիտիմ է, կառավարությունը կլինի լեգիտիմ, մոտակա 3-6 ամիսների ընթացքում ամեն ինչ կուրվագծվի»: Գտնում է, որ Սահմանադրությունը, ԸՕ-ն, կուսակցությունների մասին օրենքները պետք է փոխվեն ու եթե սուպերվարչապետական ինստիտուտը թուլացվի, հնարավոր է 1,5-2 տարի հետո նոր ընտրություններ լինեն: Խմորումները շատ տարբեր կլինեն, բայց շատ բան կախված է նոր կառավարության աշխատանքից:
«Նիկոլին մերժելու» ՀՀԿ-ի հայտարարություններին էլ նորմալ է վերաբերվում. ասում է, եթե ժողովրդավարական երկիր ենք կառուցում նորմալ է, հիշեցնում է` «Սասնա ծռերը» հայտարարում էին, որ պետք է լյուստրացիա լինի, երբ դա չկա, ստացվում է ներում ենք նախկին իշխանությունների բոլոր մեղքերը` նրանց հնարավորություն տալով լեգիտիմություն ունեցող ուժի դեմ բողոքի ցույց անել:
Նելլի ԳՐԻԳՈՐՅԱՆ
Հարգարժան պարոն, դուք ընդունում եք որ ընտրությունները եղել են ազատ ու ժողովրդավարական ու միևնույն ժամանակ խոսում եք Ձեր կուսակցության 《մուտքը փակելու》 մասին? Ես իսկապես կասկածներ ունեմ Ձեր կուսակցության մասին, որովհետև մի քիչ շեղվում եք ժողովրդավարությունից: Դուք պետք է ընդունեք որ այս պահին, ժողովուրդը ձեզ տվեց այսքան տոկոս ձայն: Դա նորմալ է և ոչ մի տեղ չի լինում որ մի քանի ամսվա կամ մի երկու տարվա կուսակցությունը ստանա շատ ձայներ: Տպավորություն է որ դուք ուզում եք ՀՀԿ-ին նորից խորհրդարան մտցնել: Ի դեպ ասեմ որ Ձեր ծրագրային դրույթները հայկական պատմական հողերի հետ կապված (և խոսքը չի գնում հայկական երկրորդ հանրապետությա, Արցախի Հանրապետության մասին) շատ մարդիկ չեն կիսում: Մենք ուզում ենք Հայաստանն ու Արցախը զարգացնել, մենք չենք ուզում Պարսկաստանից, Վրաստանից կամ Թուրքիայից հին հայկական հողեր վերադարձնել: Փառք Աստծո չկա Ասորեստան պետություն որ գար ու մեզնից հող պահանջեր: