Ազգային օպերային թատրոնի գեղարվեստական ղեկավար Կոնստանտին Օրբելյանը «Տեսակետ» ակումբում կայացած ասուլիսում ներկայացրեց այն աշխատանքը, որ կատարել է իր պաշտոնավարման ընթացքում եւ մատնանշեց այն հեղինակավոր թատրոններին ու անձանց, որոնց հետ աշխատել է մեր թատրոնը:
«Այնպես է ստացվել, որ մենք շատ ակտիվ ենք աշխատել վերջին 8 ամիսներին, եւ ներկայացումներ ենք արել` նոր «Կարմեն», նոր «Կախարդական սրինգ», «Մանոն», նաեւ հյուրախաղերի մեկնել: Շատ դժվար է 350 կոստյում կարել, սովորեցնել, ռեժիսուրան անել»,-նշեց մաեստրոն: Ասաց, որ արել են առավելագույնը, որ ներկայացումները գունեղ լինեն:
«Մեծ թատրոնը 8-9 ներկայացում է առաջարկում մեզ: Նոր ներկայացում ստեղծելը անհավանական թանկ է, կոստյումներ կարել, դեկորացիաներ ստեղծել, եթե հնարավոր լինի այդ պատրաստի ներկայացումները ձեռք բերել, ուղղակի հրաշալի կլինի»,-նշեց Կոնստանտին Օրբելյանը:
Մանրամասները` տեսանյութում
Կարդացեք նաև
Ասուլիսի ժամանակ անդրադարձ եղավ մշակույթի նախարարի պարտականությունները կատարող Նազենի Ղարիբյանի կողմից` տնօրենի պաշտոնից իրեն ազատելուն:
«Թյուրիմացություն կա այդ ամենի մեջ: Չգիտես ինչու, Նազենի Ղարիբյանը մտածում էր, որ ես ոչ լեգիտիմ եմ նշանակվել: Վերջին 8-9 ամիսներին անընդհատ այդ մասին էր խոսվում: Բայց դա իմ խնդիրը չէ…Ես հարցնում եմ` ո՞ր ոչ լեգիտիմությունն է ձեզ անհանգստացնում: Ասում են` եղել է կառավարության որոշում, եւ ես մշակույթի նախարար Արմեն Ամիրյանի կողմից նշանակվել եմ օպերային թատրոնի տնօրեն: Ասում եմ` այդ դեպքում դուք խնդիր ունեք կառավարության հետ, ուրեմն դատի տվեք կառավարությանը:
Անկախ նրանից իմ նշանակումը լեգիտիմ, թե ոչ լեգիտիմ էր, մշակույթի նախարարության հետ իմ պայմանագիրը լեգիտիմ է եղել: Ես ոչ մեկին չեմ խնդրել ինձ լավություն անել, ես չեմ խնդրել, որ ինձ տնօրեն նշանակեն, դա իմ կյանքի նպատակը չի եղել: Կրկնում եմ` այստեղ ինչ-որ թյուրիմացություն կա եւ ոչ հաջող խորհուրդ տվողներ»,-հայտարարեց Օրբելյանը
Մանրամասները` տեսանյութում
Մաեստրոն ասում է, որ նախարարությունում միշտ ցանկացել են, որ ինքն իր կամքով հեռանա, բայց ինքը հատուկ չի հեռացել:
«Այդ դեպքում ինչպե՞ս պետք է բացատրեմ կոլեկտիվին, թե ինչու եմ վերցրել ու անսպասելի հեռացել, ինչու եմ լքել թատրոնը: Ինչ հիմքով: Ես չեմ կարող դավաճանել իմ թատրոնը, այն մարդկանց, որոնք ինձ հավատում են, դա ինձ պետք չէ: Ուրեմն կամ ինձ հանեք, կամ հանգիստ թողեք»,- նշեց նա:
Ամեն դեպքում նա իր հետ կատարվածի մեջ քաղաքական ենթատեքստ չի տեսնում: «Ես ի՞նչ կապ ունեմ քաղաքականության հետ, ես քաղաքական գործիչ չեմ, չեմ զբաղվում քաղաքականությամբ: Ինձ համար Հայաստանի եւ օպերային թատրոնի ծաղկումն է կարեւոր:
Մի կարեւոր բան ասեմ` օպերայի տնօրենի պաշտոնից ինձ ազատելը բազմամիլիոնանոց PR դարձավ հենց օպերայի համար: Այժմ աշխարհը գիտի, որ Երեւանում կա օպերային թատրոն, այնտեղ կա Օրբելյան, հրաշալի կոլեկտիվ: Ավելին, աշխարհի տարբեր անկյուններից լրագրողները ցանկանում են գալ Հայաստան` եւ ոչ միայն օպերային թատրոն, այլեւ Հայաստանը տեսնելու»,- ժպտալով նշեց արվեստագետը:
Նա ասաց, որ եթե անգամ հեռանա օպերային թատրոնից, ոչ մի բան չի տանի իր հետ. «Երեւանում կա Կոնստանտին Օրբելյանի անվան դպրոց, ինչի համար հպարտ եմ: Եվ եթե հանկարծ ես օպերային թատրոնից տեղափոխվեմ, իմ աշխատասենյակի ռոյալը, որը իմ հորեղբայր Օրբելյանին է պատկանել, կնվիրեմ իր անունը կրող դպրոցին»:
Մանրամասները` տեսանյութում
Գոհար ՀԱԿՈԲՅԱՆ
