ՆՈՐ «ՇԵՖ»՝ «ՆԱԻՐԻՏՈՒՄ» Գործարանում այնքան հաճախ են տնօրեններ փոխվում, որ աշխատակիցները չեն էլ հասցնում նրանց ծանոթանալ Մեր տեղեկություններով՝ 2005-ի դեկտեմբերի 30-ին «Նաիրիտ» գործարանի կառավարման կարգում փոփոխություն է տեղի ունեցել. նախկինում կառավարման հետ կապված խնդիրները քննարկվում եւ համապատասխան որոշումներ էին ընդունվում բաժնետերերի ժողովների ժամանակ, բայց այժմ ստեղծվել է նաեւ տնօրենների խորհուրդ, եւ դեկտեմբերի 30-ին արդեն ընտրվել է խորհրդի նախագահը: Այս փաստը «Նաիրիտի» աշխատակիցներին խուճապի է մատնել, քանի որ նրանք չգիտեն իրենց նոր «շեֆի» մտադրությունները: Խուճապը մասնավորապես հետեւյալում է. քանի որ «Նաիրիտը» այսպես ասած «կիսով չափ» է գործում եւ մի շարք աշխատակիցներ պարզապես պարապ-սարապ գործարանում նստում են, չի բացառվում, որ աշխատակիցներից շատերը կրճատվեն: Այն, որ տնօրենների խորհրդի կազմն ու նախագահն ընտրվել են հենց դեկտեմբերի 30-ին՝ Ամանորի նախաշեմին, մի տեսակ հապշտապ եւ գաղտնի «գործարքի» տպավորություն է թողնում՝ հատկապես, որ դրանից ընդամենը 1 օր առաջ առեւտրի եւ տնտեսական զարգացման նախարար Կարեն Ճշմարիտյանը հրավիրած մամուլի ասուլիսում բավականին մանրամասն խոսելով «Նաիրիտի» արտադրության ծավալների, արտադրանքի իրացման եւ բազում այլ խնդիրներից՝ տնօրենների խորհրդի մասին ոչինչ չի հիշատակել: «Նաիրիտի» բաժնետոմսերը 2005 թվականի սկզբից հանձնվել էր «Պետպոլիմեր» պետական ՍՊԸ հավատարմագրային կառավարմանը, որի հիմնադիրներն են հիմնական գործարանի վարկատուները՝ այդ թվում նաեւ ՀՀ էներգետիկայի նախարարությունը: Այդ գերատեսչությունից գործարանում տեղի ունեցած փոփոխության մասին ինչ-որ բան պարզել հնարավոր չեղավ: «Նաիրիտ» գործարանում էլ տարբեր բաժինների աշխատակիցներ այդ մասին կցկտուր տեղեկություններ ունեին, իսկ տնօրենների խորհրդի նախագահի մասին ընդհանրապես ոչինչ չգիտեին, համենայնդեպս, այս առնչությամբ «Առավոտի» հարցին պատասխանում էին՝ «չենք ճանաչում, չգիտենք ով ա»: Գործարանի արհկոմի նախագահ Հրաչ Թադեւոսյանը հաստատեց, որ իսկապես, դեկտեմբերի 30-ին նիստ է կայացել եւ տնօրենների խորհուրդ է ձեւավորվել, բայց ըստ նրա՝ «դա այնքան էլ հապշտապ քայլ չէր, դեռ այդ նիստը պետք է կայանար դեկտեմբեր ամսվա մեջ, ուղղակի ինչ-ինչ պատճառներով անընդհատ հետաձգվեց-հետաձգվեց՝ հասավ մինչեւ 30-ը»: «Նաիրիտի» աշխատակիցների անհանգստությունների առնչությամբ պարոն Թադեւոսյանը հավաստիացրեց, որ իրենց մոտ նման խոսակցություններ չկան եւ աշխատակիցներն էլ շատ հանգիստ են, քանի որ ոչ մի փոփոխություն չի լինելու: Ավելին՝ ըստ մեր զրուցակցի, նոր տնօրենը հասցրել է հունվարի 9-ին հանդիպել բոլոր ստորաբաժանումների աշխատակիցների հետ ու նրանց միջեւ արդեն նորմալ հարաբերություններ են ձեւավորվել. «Նա մեր ոչ մի մասնագետի չի պատրաստվում հեռացնել աշխատանքից, մեզ մոտ ամեն ինչ կարգին է»: Պարոն Թադեւոսյանի տեղեկություններով՝ տնօրենների խորհրդի նախագահ է նշանակվել ոմն Կարեն Իսրայելյան: Վերջինիս մասին ավելի մանրամասն տեղեկություններ ստանալու համար Հ. Թադեւոսյանը խորհուրդ տվեց դիմել «Նաիրիտի» տեխնիկական գծով տնօրեն Ռուբեն Սաղաթելյանին, որն էլ Կարեն Իսրայելյանի անուն-ազգանունը լսելուն պես միանգամից սկսեց գոռգոռալ, թե «ինչների՞դ ա պետք՝ ո՞վ ա Կարեն Իսրայելյանը, ձեզ ի՞նչ, ասենք՝ ճանաչեցիք, էդ ձեզ ի՞նչ ա տալու, «Նաիրիտում» 2200 աշխատող կա, դուք սաղին ճանաչո՞ւմ եք»: Ամեն դեպքում, թե ո՞վ է Կարեն Իսրայելյանը, որտեղի՞ց է հայտնվել ու ի՞նչ կապ ունի «Նաիրիտի» հետ՝ պարոն Սաղաթելյանն ասաց՝ «ինքը հայ մարդ ա, վե՛րջ»: Անկախ գործարանի վարչական մասում տեղի ունեցած փոփոխություններից՝ «Նաիրիտը» շարունակում է սպառած էլեկտրաէներգիայի դիմաց եւ աշխատակիցներին պարտք մնալ: Խնդիրն այն է, որ թեեւ գործարանն իր ողջ հզորությամբ չի գործում, բայց շարունակում է մեծ քանակությամբ էլեկտրաէներգիա սպառել: Ձմռան այս ամիսներին էլ որոշ սարքավորումներ եւ նուրբ հաղորդալարեր ցրտից պաշտպանելու համար ստիպված ողջ գործարանը ջեռուցվում է՝ ավելացնելով պարտքը: Այս հարցում Հրաչ Թադեւոսյանի դիտարկմամբ՝ իրենք այլընտրանք չունեն. «Գործարանը էլեկտրաէներգիա ծախսել է անգամ էն տարիներին, երբ ընդհանրապես չի գործել, հիմա կիսով չափ գործում է, արտադրություն կա, չի կարելի ամբողջությամբ հոսանքազրկել»: Ինչ վերաբերում է վերջին շրջանում «Նաիրիտի» արտադրության ծավալներին, նախարար Կարեն Ճշմարիտյանն իր տարեվերջյան ասուլիսում հայտարարել էր, որ դրանք 2005-ին կրկնապատկվել են ու թեեւ մինչեւ հուլիսը գործարանն ունեցել է արտադրանքի իրացման խնդիր, հիմա այդ հարցն էլ լուծված է: Սակայն մեր տեղեկություններով՝ վերջին շրջանում «Նաիրիտը» արտադրած 320 տոննա կաուչուկը չգիտի ինչպես սպառի: ՀՌԻՓՍԻՄԵ ՋԵԲԵՋՅԱՆ