Այնտեղ գոնե մեկ անգամ այցելողը «կվայելի» դրանք
Տեսնես, ի՞նչ նկատի ուներ «Ջրաշխարհի» ղեկավարությունը «անվտանգություն» ասելով, երբ այդ մակագրությամբ շապիկներ պատվիրեց ու որոշ երիտասարդների աշխատանքի ընդունեց: Չեմ կարծում, թե տեղի «անվտանգության» աշխատակիցների ֆունկցիաների մեջ է մտնում հեռվում կանգնելն ու «հիանալը» այն տեսարանով, թե ինչպես են պարսիկները 12-13 տարեկան երեխաներին լողավազանում «ձեռք գցում»: Մի՞թե «Ջրաշխարհի» անվտանգությունը նախատեսված է միայն ծեծկռտուքներին միջամտելու համար, բայց եթե նույնիսկ այդպես է, ապա ցանկացած իրեն հարգող հայ տղամարդ աչք չէր փակի նմանատիպ տեսարանների վրա, չէր «զմայլվի» անչափահասի նկատմամբ ոտնձգություններ կատարող պարսիկի անթույլատրելի արարքներով: «Անվտանգութան» աշխատակիցը, բնականաբար, պարսիկների «խաթրին չէր կպնի», այլապես ղեկավարության կողմից դիտողություն կստանար, քանի որ մեր հարավային հարեւանները «Ջրաշխարհի» մշտական ու լավագույն հաճախորդներն են դարձել. դրա վառ ապացույցն են տարածքում տեղակայված սննդի վաճառքի կետերը, որոնց վրա սննդի անվանումները միայն հայերեն ու պարսկերեն լեզուներով են գրված: «Ջրաշխարհի» «անվտանգության» աշխատակցին արված իմ նկատողությանը՝ ինչո՞ւ չեք կարգի հրավիրում լողավազանում իրենց անվայելուչ պահող պարսիկներին, երիտասարդը պատասխանեց. «Ոնց որ դուք, ընենց էլ իրանք: Հա, ի՞նչ են անում որ, մարդիկ իրանց համար խելոք լողանում են: Համ էլ, դու խի՞ ես անհանգստանում որ, էդ երեխեքը մեր ունեն, թող գան՝ տիրություն անեն…»: Հետաքրքիր է, եթե «Ջրաշխարհի» «առաջադեմ» անձնակազմի համար պարսիկ հաճախորդի կողմից հայ անչափահասին «ձեռք գցելը» համարվում է «խելոք լողանալ», ապա բռնաբարությունն ինչպե՞ս կանվանեն՝ «աղջիկ խոսացնե՞լ»: Պարզ է, որ այս զվարճանքի վայրը նախատեսված չէ միայն հայերի համար, բայց ակնհայտ է, որ օրական մոտ 1500-2000 այցելուներից մեծամասնությունը պարսիկներ են ու շատ արտոնյալ վիճակում: «Ջրաշխարհ» մտնելիս, յուրաքանչյուր հաճախորդի հենց մուտքի մոտ զգուշացնում են՝ եթե ֆոտոխցիկ ունեք, ապա միայն ինքներդ ձեզ կնկարեք, «տարածքը չի կարելի նկարել»: Այս դեպքում հարց է առաջանում, ինչի՞ համար են հագուստներով, չլողանալու նպատակով ներս մտնում խումբ-խումբ պարսիկ տղամարդիկ, ի՞նչ կամ ո՞ւմ են ֆիքսում նրանց ֆոտոխցիկները… Տարածված ասեկոսեները, ըստ որոնց՝ պարսիկների գաղտնի նկարահանումները հայտնվում են YouTube-ում, փաստորեն օդից չեն……
Այս ամենից բացի, «Ջրաշխարհում» առկա են մի շարք այլ թերություններ: Բացի այն, որ տարածք մուտք գործելու համար պետք է վճարես 5000 դրամ, մուտքի մոտից սկսած քեզ մի լավ թալանում են: Օրինակ՝ իրերի, հագուստների համար նախատեսված «զամբյուղները» հաճախորդներին տրվում է միայն 400 դրամ վճարելուց հետո, հակառակ դեպքում ստիպված կլինես իրերդ հետդ «ման տալ», իսկ դրանց կորելու դեպքում էլ «Ջրաշխարհը» պատասխանատվություն չի կրում: Եթե ուզում ես օգտվել ջրային այն ատրակցիոններից, որոնք միայն փրկօղակի առկայության դեպքում կկարողանաս, ապա երկու տարբերակ ունես. առաջինը՝ ժամերով հերթ կանգնել մեկ անգամ օգտվելու համար, երկրորդը՝ 10 000 դրամ վճարել եւ փրկօղակը ամբողջ օրը վարձակալել: Իսկ որոշ ատրակցիոններից մեկ անգամ օգտվելու համար էլ, որը նույնպես պարտադիր փրկօղակով է՝ պետք է մեկ տեղանոցի համար՝ 500, երկտեղանոցի համար 800 դրամ վճարել: Ջրային ատրակցիոններից օգտվելիս, երեւի, պետք է մեծ կամքի ուժ ունենալ, որովհետեւ փրկօղակները, որոնք անհրաժեշտ են այդ ատրակցիոնների դեպքում, հիմնականում պոկված բռնակներով են, իսկ այդ բռնակներն ավելի քան անհրաժեշտ են, որովհետեւ չբռնվելու դեպքում օդային տարածքով կհայտնվես «Ջրաշխարհից» դուրս:
Իսկ եթե հանկարծ որոշես սնվել, կամ որեւէ բան խմել, ապա այս մասով էլ «տուժող կողմ» կճանաչվես: Վաճառասեղանի հետեւում կանգնած երիտասարդները, աճպարարի նման այնպես քեզ կթալանեն, որ միայն որոշ ժամանակ անց կհասկանաս, որ նրանց վերադարձրած մանրադրամը չի համապատասխանում «սեփական» առեւտրիդ: Ամենացավալին այն է, որ ոչ գումարդ «շորթելու» պահին եւ ոչ էլ որոշ ժամանակ անց չես կարող ապացուցել, քանի որ «Ջրաշխարհում» ծախսած գումարների դիմաց հաճախորդին ՀԴՄ կտրոն չի տրամադրվում:
Հ. Գ. Ես ռասիստ չեմ. եթե պարսիկների փոխարեն լինեին ֆրանսիացիներ, իտալացիներ, հնդիկներ, հայեր… միեւնույն է՝ հոդվածը կգրեի: