«Որեւէ բանակցություն այս պահին չի գնում՝ նոր կոալիցիոն հուշագիր ստորագրելու համար»,- այսօր «Հայելի» ակումբում հայտարարեց ՀՀԿ փոխնախագահ Գալուստ Սահակյանը: Ըստ նրա, նախկին կոալիցիոն հուշագիրը դեռ ուժի մեջ է, իսկ այնտեղ ԲՀԿ-ն խոստացել է սատարել Սերժ Սարգսյանի թեկնածությունը:
Հարցին՝ այսինքն՝ Դուք առաջնորդվում եք այն հուշագրով, որտեղ Գագիկ Ծառուկյանը նման բան է խոստացել՝ Գալուստ Սահակյանը պատասխանեց. «Մենք ոչ մի բանով չենք առաջնորդվում: Մենք պատրաստվում ենք համագումարին, որը տեղի կունենա դեկտեմբերին: Մենք այսպես ենք հարցը դնում՝ շատ լավ կլինի, որ մեզ պաշտպանեն բոլոր ուժերը: Մենք աշխատելու ենք մեր թեկնածուի օգտին: Դրանից հետո թե ովքեր կմիանան՝ բոլոր տարբերակներին պատրաստվում ենք: Ինչքան ակտիվ եւ զուսպ ընտրություններ լինեն, այնքան շահեկան վիճակում կհայտնվի Հայաստանը»:
Հարցին՝ ո՞րն է այն գինը, որը Գագիկ Ծառուկյանին պետք է վճարեք՝ սատարելու դիմաց՝ Գալուստ Սահակյանը պատասխանեց. «Երբ դոլարի կուրսը փոխվի՝ կասենք»:
Կարդացեք նաև
Հարցին, թե ինչպե՞ս եք դիտարկում ՀԱԿ-ԲՀԿ համագործակցությունը՝ ՀՀ խմբակցության ղեկավարը վստահեցրեց, որ բոլոր համագործակցություններն էլ ընդունելի են:
Երբ Քոչարյանը հայտարարությամբ է հանդես գալիս՝ ՀՀԿ-ականները խառնվում են իրար, ինչի՞ց է դա, որ վախենում եք, որ նա կառաջադրվի՞՝ Գալուստ Սահակյանը պատասխանեց. «Մեզ պետք է չասեիք դա, որովհետեւ մեք Ռոբերտ Քոչարյանին սատարողեր ենք եղել: Վախի սինդրոմներ չպիտի լինեն, ինչի՞ց վախենանք»:
Հռիփսիմե ՋԵԲԵՋՅԱՆ
