Աբովյան հեռուստաընկերության տնօրեն Ազնիվ Չիզմեչյանը Aravot.am-ին նոր մանրամասներ է պատմում նախօրեին Աբովյանում Գագիկ Ծառուկյանին պատկանող «Առինջ մոլ» առեւտրի կենտրոնից բողոքող առեւտրականների ակցիայից:
Ազնիվ Չիզմեչյանը նույն օրը ոստիկանությունում հաղորդում էր տվել, որ իր հեռուստաընկերության լրագրողի ու օպերատորի աշխատանքը խոչընդոտել են:
«Լրագրողն ու օպերատորը գնացել են նկարահանման: Երբ տեղ են հասել, ժողովուրդը արդեն հավաքված է եղել, մինչեւ օպերատորը փորձել է տեսախցիկը հենակի վրա ձգել, այդ պահին երկու սափրագլուխ, ամրակազմ երիտասարդ մոտեցել են, հրել օպերատորին ու ասել է մի նկարի, ես քեզ թո՞ւյլ եմ տվել, որ նկարում ես, գիտես, որ նկարես ինչ կլինի, կկոտրեմ տեսախցիկդ: Լրագրողն էլ միջամտել է, թե ժողովրդին նկարելու իրավունք չկա՞»,- պատմեց տնօրենը:
Նրա խոսքով, միջադեպից հետո հեռուստաընկերության աշխատակիցները զանգահարել են իրեն, ներկայացրել իրավիճակը. «Ես էլ ասացի` եկեք խմբագրություն: Սա առաջին դեպքը չէր, ու ես ինքս լրագրողի ու օպերատորի հետ գնացի ոստիկանություն ու հայտարարություն տվեցի, որ նման միջադեպ է տեղի ունեցել: Քանի որ Աբովյանում քաղաքապետի ընտրություններ են ու ինչքան օրերը մոտենան, այնքան թեժանալու է, որոշեցի այդ մասին հաղորդում տամ: Լրագրողն ու օպերատորը չեն կարողանում փողոց դուրս գալ ու սովորականի պես աշխատել, Աբովյանում մթնոլորտը լարված է»:
Կարդացեք նաև
Հեռուստաընկերության տնօրենի խոսքով, այս վերջին միջադեպից առաջ էլի եղել են դեպքեր, երբ նախընտրական շրջանում իր աշխատակիցների աշխատանքը խոչընդոտվել է, բայց կոնֆլիկտից խուսափելու համար ինքը փորձել է հարթել ու լարվածություն չստեղծել: Մեր հարցին, կրկին Ծառուկյանի թիկնազորի՞ց են խոչընդոտել հեռուստաընկերության աշխատակիցների աշխատանքը, նա չցանկացավ պատասխանել:
Հիշեցնենք, որ ոստիկանության լրատվության եւ հասարակայնության հետ կապերի բաժնի աշխատակից Արմեն Մալխասյանը «Գալայի» հետ զրույցում ասել էր, թե հաղորդման մեջ նշված չէ` լրատվամիջոցի ներկայացուցիչների աշխատանքն ովքեր են խոչընդոտել ու ինչ պայմաններում:
Հիշեցնենք, որ նախօրեին 1in.am-ը հաղորդել էր, որ Աբովյանի շուկայի մի խումբ առեւտրականներ բողոքի ակցիա են կազմակերպել՝ ընդդեմ ԲՀԿ նախկին առաջնորդ Գագիկ Ծառուկյանի կողմից վերջերս Աբովյանում բացված «Առինջ մոլ» առեւտրի կենտրոնի: Եվ ակցիայի ժամանակ Ծառուկյանի թիկնազորը բռնություն է կիրառել առեւտրականների եւ ակցիան լուսաբանող լրագրողների նկատմամբ:
Ինչ վերաբերում է Գագիկ Ծառուկյանի մամլո խոսնակ Իվետա Տոնոյանի հայտարարությանը, թե ինքը տեղեկություններ է ստացել, որ առեւտրականների բողոք-դժգոհությունները լուսաբանող լրագրող տարածքում չի եղել, Ազնիվ Չիզմեչյանն ասաց. «Հնարավոր չէ այդ բազմության միջից չնկատել հեռուստաընկերության լոգոյով միկրոֆոնը, տեսախցիկը: Այդ ամեն ինչը թող ոստիկանությունը պարզի, տեսնենք` ովքեր են եղել խոչընդոտողները»:
Արփինե ՍԻՄՈՆՅԱՆ
Armlur.am-ի լուսանկարում Գագիկ Ծառուկյանի թիկնազորի ղեկավարն է:
