Այրվածքներին չի կարելի ձեթ, տոմատ, մածուն կամ ձու քսել: Այսօր «Բլից ինֆո» մամուլի ակումբում ասաց Ճառագայթային բժշկության եւ այրվածքների գիտական կենտրոնի այրվածքաբան Նազի Բարսեղյանը: Նրա խոսքերով, ջերմային, արեւի կամ հրդեհի հետեւանքով առաջացած այրված մակերեսին անմիջապես պետք է սառույց կամ սառը ջուր դնել, որպեսզի այրվածքը չխորանա, մակերեսը չտարածվի, ապա դիմել բժշկի օգնությանը: Իսկ տնական մեթոդները ցավը փոքր-ինչ մեղմացնում են միայն այն պատճառով, քանի որ սառն են լինում, որովհետեւ պահվում են սառնարանում:
Նազի Բարսեղյանը խորհուրդ է տալիս արեւայրուքից էլ զգուշանալ, քանի որ արեւի ճառագայթների հետեւանքով մաշկի տակ մեծ քանակությամբ մելանին նյութ է սկսում առաջանալ, ինչը հետագայում կարող է մի շարք հիվանդությունների պատճառ դառնալ:
Բժշկի խոսքերով, եթե, այնուամենայնիվ, արեւայրուք ընդունում են, պետք է առաջին մի քանի օրը ոչ թե արեւայրուքի համար նախատեսված քսուք, այլ` պաշտպանիչ քսուք օգտագործել, որպեսզի մաշկն աստիճանաբար ընտելանա եւ միանգամից չայրվի: Բացի այդ, առաջին օրը արեւի տակ պետք է գտնվել 10-15 րոպե, երկրորդ օրը 20 րոպե, ապա` աստիճանաբար ավելացնել:
Տիկին Բարսեղյանն ասաց, որ արեւայրուքը կարող է նպաստել մաշկի չորացմանը, վաղ ծերացմանն ու կնճիռների առաջացմանը: Բժշկի խոսքերով, այրվածքին պետք է վիտամիններ պարունակող քսուքներ քսել, պահել բարձր դիրքում, որպեսզի ցավերը մեղմ լինեն: Արեւահարվելու նշաններն են ջերմությունը, սրտխառնոցը, ճնշման անկումը:
Ամռան շոգերից պաշտպանվելու համար էլ բժշկի վստահեցմամբ պետք է շատ հեղուկ խմել, մասնավորապես` մաքուր ջուր: Նրա խոսքերով, հյութեր նույնպես կարելի է, բայց օրգանիզմի պաշտպանության համար ավելի օգտակարը ջուրն է: Հեղուկի քանակությունը կախված է մարդու քաշից: Ըստ Նազի Բարսեղյանի, հինգ տարեկան երեխան չպետք է խմի այնքան հեղուկ, որքան մեծահասակը: Երեխաներին խորհուրդ է տրվում օգտագործել օրական մեկուկես լիտր ջուր, մեծահասակներին` կախված քաշից` 3-ից 5-6 լիտր:
Լուսինե ԲՈՒԴԱՂՅԱՆ
