«Ես չգիտեմ որևէ տվյալ, եթե դա տեսական դատողություն չէ, որ ՀՀ-ում ներքին հանցագործությունների արդյունավետ կանխարգելումն իրականացնում է ոստիկանությունը»,- «Հոդված 3» մամուլի ակումբում հրավիրված քննարկմանը, խոսելով խորհրդարանում դեկտեմբերի 10-ին առաջին ընթերցմամբ ընդունված «Իմ քայլը» խմբակցության պատգամավորներ Արմեն Խաչատրյանի ու Սիփան Փաշինյանի հեղինակած «Օպերատիվ-հետախուզական գործունեության մասին» օրենքում փոփոխություններ կատարելու նախագծի մասին, այսպիսի կարծիք հայտնեց ազգագրագետ Հրանուշ Խառատյանը: Նշենք, որ օրինագծով պատգամավորներն առաջարկում են հեռախոսային խոսակցությունների գաղտնալսման հնարավորություն տալ նաև ոստիկանությանը:
Ըստ Հրանուշ Խառատյանի՝ ոստիկանությունը պետք է և կարող է ունենալ իր առանձին տեխնիկական միջոցները, բայց նա չի հավատում, որ հանցավորության դեմ ութսուն տոկոս պայքարն իրականացնում է ոստիկանությունը: Նա հավելեց. «Չեմ հավատում նաև այն պատճառով, որ այդ դեպքում ԱԱԾ-ն չէր ունենա վեցերորդ վարչություն, բոլոր կոռուպցիոն գործերն ԱԱԾ-ին չէին հանձնարարվի, այլ ոստիկանությանը: Մեկուկես տարում ԱԱԾ-ն ունեցել է մոնոպոլ իրավունք գաղտնալսող սարքերի վերաբերյալ: Կարող է՝ երբ, ինչ ուզի, անի, բայց դրանք չեն ծառայել այս գործերով բացահայտումներին»:
Հրանուշ Խառատյանը հարցրեց, եթե գաղտնալսում են, ապա դրանից ո՞ւմ է օգուտ, ո՞ւմ դեմ է, ո՞ւմ դեմ են դրանք օգտագործում՝ ելնելով ՀՀ-ում հենց հանցավորության և կոռուպցիոն սխեմաներով մեր փորձից: Ազգագրագետն ասաց. «Նյութերով ցույց տվեք, որ հանցավորության ութսուն տոկոսի պատասխանատուն ոստիկանությունն է: Հանցագործությունների մեծագույն մասը մեզ հետաքրքրող քրեական գործերով մնում են բաց: ԱԱԾ-ում ունեն մարտի 1-ի բոլոր տեսանկարահանումները, ո՞ւր են դրանց հետևանքները: Հետևաբար ինչո՞ւ հավատամ, որ եթե այսօր ոստիկանությունն ունենա այդ միջոցները, կանխելու է նոր մարտի մեկերը»:
Հրանուշ Խառատյանի կարծիքով՝ մեր՝ երեք միլիոնանոց երկրում մի ահռելի ագենտուրայի ցանց կա, որ մեզ լրտեսում է մեր կյանքի ամենատարբեր իրավիճակներում. «Մեր բյուջեն վճարում է նրանց, որ ինձ լրտեսի՞: Ինչո՞ւ է մեր երկիրն այսքան թաղված այսպիսի պետական հանցագործությունների ցանցում, ինչո՞ւ ենք ունեցել այդքան հանցագործ իշխանություններ, այդ ագենտուրան ինչի՞ն է ծառայել: Ես հիսուն հազար մարդու անձնական քննչական գործ եմ նայել ԽՍՀՄ-ի կերած գլուխներից, և տեսնում եմ ագենտուրային տեղեկություններն ինչ են ասում այդ մարդկանց մասին՝ սուտ: Ագենտին ասում են գրի սա, գրում է, դրա հետևանքով այդ մարդու նկատմամբ գործ են հարուցում: Այսօրվա ԱԱԾ նյութերը չեմ տեսել ու չեմ կարող վստահ լինել, որ այդ ամենը հիմա չի կրկնվում»:
Կարդացեք նաև
Հրանուշ Խառատյանը կարծում է, որ այս պահին ԱԱԾ-ն դուրս է եկել կառավարության վերահսկողությունից, և կառավարությունն ու իշխանությունն ուղղակի կարիք ունեին վերաքննող մի մարմնի, որին իրենք վստահում են»:
Հելսինկյան քաղաքացիական ասամբլեայի Վանաձորի գրասենյակի ղեկավար, իրավապաշտպան Արթուր Սաքունցը ՀՔԾ և ԱԱԾ պետերի գաղտնալսման հնարավոր վարկած առաջադրեց. «Մի վարկած մոտս առաջացավ. խոսքը ՀՔԾ և ԱԱԾ պետերի հեռախոսային գաղտնի խոսակցությանն է վերաբերում: Ակամա իրապես համոզմունք առաջացավ, քանի որ մի մարմին է գաղտնալսել, հիմնավոր կասկած եմ հայտնում, որ ԱԱԾ-ն է գաղտնալսել: Եթե ուրիշ մարմին չունի տեխնիկական միջոց, ապա ո՞վ կարող էր գաղտնալսել: Ուշադրություն դարձրեք, որ ՀՔԾ պետն այդ ժամանակ այստեղ էր գտնվում: Մենք ուշադրություն դարձրինք միայն Վանեցյանի՝ Հայաստանից դուրս գտնվելու վրա, բայց ՀՔԾ պետն այստեղ էր գտնվում»:
Արթուր Սաքունցն ասաց՝ ոչ ՀՔԾ պետը, ոչ Վանեցյանն ահաբեկիչներ չեն, որ իրենց հեռախոսային խոսակցությունը լսել են, առավել ևս մենք չենք ահաբեկիչները, որ մեր հեռախոսային խոսակցությունները լսել են:
Անդրադառնալով օրենսդրական նախաձեռնությանը՝ Արթուր Սաքունցը հորդորեց մինչև նման օրինագծեր շրջանառելը, որոնք վերաբերում են դատաիրավական համակարգին, դնել հանրային քննարկման:
Տաթև ՀԱՐՈՒԹՅՈՒՆՅԱՆ
Լուսանկարը՝ «Հոդված 3» մամուլի ակումբի