ԱԺ այսօրվա նիստում քննարկվում էր «ԱՊՀ շրջանակում ահաբեկչության եւ ծայրահեղականության, այլ բռնի դրսեւորումների, դրանց ֆինանսավորման դեմ պայքարի ոլորտում տեղեկության փոխանակման մասին համաձայնագիրը վավերացնելու» մասին ՀՀ օրենքի նախագիծը, որ ուժի մեջ պետք է մտնի ՀՀ ԱԺ-ի կողմից վավերացման դեպքում: Ինչպես հայտարարեց ՀՀ ԱԱԾ պետի ժամանակավոր պաշտոնակատար Էդուարդ Մարտիրոսյանը՝ համաձայնագիրը ստորագրվել է 2017թ.-ին՝ ՌԴ-ի, ՀՀ-ի, Բելառուսի, Ղազախստանի, Ղրղզստանի, Տաջիկստանի եւ Ուզբեկստանի կողմից:
«Համաձայնագիրը կնպաստի ահաբեկչության եւ բռնության դեմ պայքարում տեղեկատվության դիվանագիտական եւ այլ միջոցներով փոխանակմանը՝ միջպետական մակարդակում»,-նշեց Էդուարդ Մարտիրոսյանը: Նա փաստեց, որ ըստ ՀՀ ՍԴ եզրակացության՝ համաձայնագրով ՀՀ-ի ստանձնելիք պարտավորությունները չեն հակասում ՀՀ Սահմանադրությանը:
Պատգամավորները հետաքրքրվեցին՝ մինչեւ համաձայնագիրը հարցն ինչպե՞ս էր լուծվում: ԱԱԾ պետի պաշտոնակատարը հայտնեց, որ ԱՊՀ երկրների հակաահաբեկչական կենտրոնը, որի հետ գործակցում են, գտնվում է Մոսկվայում, իսկ այդ ոլորտում Մոսկվայի հետ մինչեւ համաձայնագրի ստորագրումը գործակցությունը եղել է դեռեւս 1992թ.-ին. «Իրավական առումով այս համաձայնագիրը մեր գործակցությունն ավելի արդյունավետ կդարձնի: Գործակցություն ունեցել ենք ԱՊՀ գրեթե բոլոր պետությունների հետ առանձին-առանձին»:
ԲՀԿ պատգամավոր Սերգեյ Բագրատյանը մտահոգություն հայտնեց. «ԱՊՀ երկրների ցանկում մեր համար հակառակորդ երկիր էլ կա՝ Ադրբեջանը: Հակաահաբեկչական պայքարը ենթադրում է, որ հակառակորդ երկրի տարածքով կարող են ՀՀ ներթափանցել… այս ռիսկը գնահատե՞լ եք»:
Կարդացեք նաև
Էդուարդ Մարտիրոսյանը շեշտեց. «ԱՊՀ երկրների հետ գործակցությունը մեր համար չի կրում պարտավորություն, եթե այն հակասում է մեր շահերին: Մենք իրավասու ենք այլ պետությանը տվյալներ եւ տեղեկություն չտրամադրելու: Իհարկե, համաձայնագրում կան պետություններ, որոնք կարող են ինչ-ինչ շահերից ելնելով՝ հարցումներ կատարել իրենց նեղ շրջանակների, ահաբեկիչների համար, որոնք կմուտքագրվեն ընդհանուր շտեմարան: Մեր պատասխանը կլինի այն, որ դա հակասում է մեր շահերին եւ օրենսդրությանը, ուստի իրավունք ունենք մերժելու հարցման կատարումը: Դա ամրագրված է համաձայնագրի կետերից մեկով»:
Սերգեյ Բագրատյանն օրինակ վկայակոչելով հարցրեց. «Հնարավո՞ր է Մոսկվայի հակաահաբեկչական այդ կենտրոնից հարցնել եւ իմանալ, թե ինչ ահաբեկչական խմբեր են ներթափանցել Ադրբեջան»:
Էդուարդ Մարտիրոսյանը պատասխանեց. «Տեղեկատվությունը համակարգում է ԱՊՀ հակաահաբեկչական կենտրոնը: Պետություններն ահաբեկիչների մասին իրենց տվյալները մուտքագրում են շտեմարան, որի համակարգումը կատարում է կենտրոնը: Մենք, իհարկե, կարող ենք տեղեկացնել այս կամ այն խմբավորումների վերաբերյալ եւ տեղեկատվության փոխանակման նպատակով համագործակցություն սահմանենք ԱՊՀ մյուս պետությունների հետ: Ասեմ, որ ահաբեկչությունը սահման չի ճանաչում, եւ բոլոր պետություններն են հակված դրա դեմ պայքարին»:
Լուիզա ՍՈՒՔԻԱՍՅԱՆ
