STARMUS-ի շրջանակում սեպտեմբերի 8-ից Ազատության հրապարակում մեկնարկել է Science Camp ծրագիրը` Գիտության ճամբարը, որը կշարունակվի մինչեւ սեպտեմբերի 11-ը՝ ամեն օր ժամը 17-23-ը: Մեր այցելության պահին բոլոր տաղավարներում կուտակումներ էին, ինչը ոգեւորում էր տաղավարների կազմակերպիչներին:
«Շատ բարձր է ակտիվության մակարդակը, երեխաներն ավելի շատ հետաքրքրվում են առողջ քաշի, առողջ սնուցման հարցերով, արդյոք իրենց քաշը նորմայի մե՞ջ է, ավե՞լ է, թե՞ նորմայից պակաս է: Որպես կանոն` մեզ մոտեցողները հիմնականում թերքաշ են, հավանաբար այն մարդիկ, որոնք ավել քաշ ունեն, գիտակցում են դա եւ չեն մոտենում»,-ժպտալով ասաց ԳԱԱ Էկոկենտրոնի սննդի ռիսկերի գնահատման կենտրոնի ղեկավար, սննդագիտության դոկտոր Դավիթ Պիպոյանը: Նա նաեւ նշեց, որ երեխաներն ավելի շատ հարցնում են, թե նորմայից պակաս քաշ ունենալը ինչ առողջական խնդիրներ կարող է առաջացնել:
«Մենք նաեւ իրենց մեր բավականին հետաքրքիր Սմարթ կշեռքն ենք ցույց տալիս, որը տան պայմաններում հնարավորություն է ընձեռում որոշել, թե օրական ինչքան սպիտակուց ու ածխաջուր ենք ստանում: Այն մարդկանց համար, որոնք ուզում են առողջ ապրելակերպ ունենալ, հրաշալի լուծում է` տան պայմաններում իրենց փոխարեն հաշվարկելը»,-ասաց Պիպոյանը:
Հարություն Հաբաշյանը
Զրուցեցինք նաեւ SCYLLA ընկերության ներկայացուցիչ Հարություն Հաբաշյանի հետ, որը շրջապատված էր երեխաներով, եւ նրանց տաղավարում ասեղ գցելու տեղ չկար: «Արհեստական բանականություն օգտագործելու միջոցով օբյեկտների ճանաչմամբ ենք զբաղվում, ինչպես օբյեկտներ, այնպես էլ վարքագիծ ենք տարբերակում: Օբյեկտների մեջ կարող է լինել` զենք, մարդ, մեքենաներ, վարքագիծը կարող է լինել գողություն, ծեծ, կռիվ, ծուխ կրակ»,- երեխաներին պատմում էր Հարությունը: Նա ասաց, որ երեխաներին հետաքրքրում է, թե արդյոք իրենք զբաղվում եւ ուսուցողական ծրագրերով:
Միքայել Բադալյանը
Հնագիտության տաղավարը ներկայացրեց Էրեբունի պատմահնագիտական արգելոց թանգարանի տնօրեն Միքայել Բադալյանը: «Մենք փորձել ենք ընտրել ինտերակտիվ ծրագրեր, եւ այնպիսի ծրագրեր, որոնք այցելուները տեսնելիս նաեւ հաճույք կստանան»,-Aravot.am-ի հետ զրույցում ասաց նա: Հավելեց, որ տաղավարի մի հատվածում ներկայացված են հայտնի հնագիտական, ուրարտական իրերի կրկնօրինակները, օրինակ` Երևանի ծննդյան վկայականի քարե սեպագիր արձանագրության կրկնօրինակը, հատուկ պաստառներ են դրված, մի անկյունն էլ նախատեսված է տեսողության հետ խնդիրներ ունեցողների համար: Նրանք կարող են Բրայլյան համակարգով կարդալ ցանկացած իրի բնութագիրը, իսկ ազնվական ուրարտուհու հետ նկարվողների պակաս չկար: Կային նաեւ Երվանդունիների ժամանակաշրջանի ռիտոնների կրկնօրինակներն , ինչպես նաեւ ստեղծվել էր պեղավայր, որտեղ փոքրիկները պեղումներ էին անում: «Սա եւ հաճելի է, եւ սեր է արթնացնում դեպի հողն ու դեպի հնագիտությունը»,-ասաց Միքայել Բադալյանը:
Կարդացեք նաև
Հավելենք, որ տարբեր տաղավարներ ներկայացնում էին տարբեր ոլորտներ ու գիտության ճյուղեր` աստղաֆիզիկա, լազերային ֆիզիկա, դրոններ, ռոբոտաշինություն, աստղադիտակներ, տիեզերական և արհեստական արբանյակներ եւ այլն:
Գոհար ՀԱԿՈԲՅԱՆ
