ԱՄՆ նորընտիր նախագահ, միլիարդատեր Դոնալդ Թրամփը ոչ միայն հաջողված բիզնեսմեն է անշարժ գույքի շուկայում, այլեւ լինելով սպորտի ակտիվ սիրահար, շատ ընդհանրություններ ունի ՌԴ նախագահ Վլադիմիր Պուտինի հետ:
Թրամփը սպորտի ոլորտում նույնպես խոշոր ներդրումներ է կատարել: Ճիշտ է, դրանց մի մասը նրան չաղլիկ շահույթ է բերել, մյուս մասում էլ, ինչպես ասում են, «տակ է տվել»: Մարզաձեւերն ընտրելիս, նա առաջնորդվել է երկու սկզբունքներով. շահույթ ստանալը եւ սպորտի միջոցով իր անունը մարզական բրենդ դարձնելը:
1984 թվականին Թրամփը գնել է ամերիկյան ֆուտբոլի «Նյու-Ջերսի Ջեներալզ» թիմը:
!988-ին նա $ 11 միլիոնով շահել է գերծանր քաշային կարգում բռնցքամարտի աշխարհի բացարձակ չեմպիոնի տիտղոսի համար Մայք Թայսոն-Լեոն Սփինքս մենամարտը կազմակերպելու մրցույթը: Այն կայացել է Ատլանտիկ-Սիթիում՝ «Թրամփ Պլազայում» եւ արդեն 91-րդ վայրկյանին ավարտվել Թայսոնի՝ նոկաուտով տարած հաղթանակով: Այդ մենամարտից հետո Դոնալդ Թրամփը դարձել է «Երկաթյա Մայքի» ֆինանսական գծով խորհրդականը:
1989 թվականին միլիարդատերը դրել է «Տուր դե Թրամփ» բազմօրյա հեծանվավազքի հիմքը:
2008 թվականին MMA մարտեր կազմակերպելու նպատակով հիմնել է Affliction ընկերությունը եւ առաջին իսկ մենամարտը կազմակերպել Ֆյոդոր Եմելյանենկոյի եւ Թիմ Սիլվիայի միջեւ:
Թրամփը նաեւ գոլֆի մեծ սիրահար ու ֆունկցիոներ է: Տարբեր տեղեկություններով, նա այս մարզաձեւի դաշտեր ունեցող 18 առողջարանների սեփականատեր է: 2014 թվականին նա Շոտլանդիայում ձեռք է բերել Տերնբերրի հյուրանոցը եւ Այրշիր առողջարանը, որտեղ անցկացվում է գոլֆի ամենահին ու ամենահեղինակավոր մրցաշարերից մեկը՝ Մեծ Բրիտանիայի բաց առաջնությունը:
Եվ վերջապես, արքայական մարզաձեւ թենիսը: Թրամփը թենիս խաղում է, եթե ազատ ժամանակ է ունենում: Սակայն հետեւում է թենիսի աշխարհում կազմակերպվող մրցաշարերին եւ իրադարձություններին: Իր գրքերից մեկու նա նույնիսկ վերլուծում է թենիսի առանձնահատկությունները եւ օգտակարությունը՝ նշելով, որ հենց այս մարզաձեւն է իրեն օգնել՝ հաջողությունների հասնել կյանքում: Դոնալդ Թրամփի սիրելի թենիսիստը շվեյցարացի Ռոժե Ֆեդերերն է:
Աշոտ ՀԱԿՈԲՅԱՆ
