Մեծ Բրիտանիայի Համայնքների պալատում Հայոց ցեղասպանությունը ճանաչելու մասին օրինագիծն առաջին ընթերցմամբ ընդունվել է առանց առարկությունների: Oրինագծի հաջորդ ընթերցումը տեղի կունենա 2022 թվականի մարտի 18-ին։
Թուրքագետ Ռուբեն Մելքոնյանի գնահատմամբ, սակայն, այս որոշումը որևէ առնչություն չունի համամարդկային արժեքներին Մեծ Բրիտանիայի հավատարմության, բարոյականության, պատմական ճշմարտությանը բաց աչքերով նայելու պատրաստակամության հետ, և այն պետք է արժանանա Հայաստանի ու հայ ժողովրդի սառը, չափավոր արձագանքին:
«Հայոց ցեղասպանության հարցն իրենց ժողովրդավար հռչակած որոշ պետությունների համար շարունակում է մնալ քաղաքական առևտրի առարկա, որը կիրառում են՝ ըստ նպատակահարմարության:
Ակնհայտ է, որ դրանում կա Թուրքիայի հանդեպ արևմտյան երկրների՝ որոշակի զսպման մեխանիզմներ կիրառելու ցանկությունը»,- 168.am-ի հետ զրույցում մանրամասնեց թուրքագետը՝ հիշեցնելով նաև, որ Մեծ Բրիտանիան ողջ պատմության ընթացքում դիվանագիտական ասպարեզում Հայաստանին և հայ ժողովրդին ամենածանր հարվածներ հասցրած պետությունն է. «19-րդ դարից սկսած՝ բոլոր միջազգային պայմանագրերում ու բանակցություններում Մեծ Բրիտանիան խաղացել է հակահայկական ընդգծված դեր, և նաև այդ պատճառով է, որ հայկական հողատիրությունը, Հայ Դատը տարբեր տարիների բախվել են անհաջողության. պատմական շատ տարածքներ չեն վերադարձվել՝ մնալով թուրքական օկուպացիայի տակ»:
Կարդացեք նաև
Ռուբեն Մելքոնյանն արձանագրեց՝ Մեծ Բրիտանիայի որդեգրած պահվածքն այսօր էլ շարունակվում է. Մեծ Բրիտանիան Ադրբեջանի և Թուրքիայի դաշնակիցն է, ունեն բազմաթիվ ընդհանուր շահեր:
«Կոնկրետ ինձ համար՝ որպես թուրքագետի, ՄԲ ընդունած որոշումը չունի որևէ արժեք»,- հավելեց թուրքագետը:
Զարուհի ԴԻԼԱՆՅԱՆ
Հոդվածն ամբողջությամբ՝ «168 ժամ» թերթի այսօրվա համարում։
