Գետի աղտոտման դեպք է արձանագրվել Ախթալա խոշորացված համայնքում: Բնակիչներից Կամո Ղարագյոզյանը սոցիալական ցանցի իր էջում տեսանյութեր և լուսանկարներ է տեղադրել, որոնցում պարզ երևում է, որ դեղնադարչնագույն աղտոտված ջրերը լցվում են Դեբեդ գետը:
«Փաստի» հետ զրույցում Ղարագյոզյանը հստակ չի կարողանում ասել, թե այս աղտոտված ջրերը, թափոնները կոնկրետ որտեղից են գալիս, բայց հավանականությունը մեծ է, որ դրանք հոսում և Դեբեդ են լցվում Ախթալայի լեռնահարստացուցիչ կոմբինատից: «Նույն խնդիրը եղել է մոտավորապես մեկ ամիս առաջ: Այն ժամանակ գետը թափվող աղտոտված ջուրն ավելի մուգ էր՝ կակաոյի գույնի: Խնդրին արձագանքեցին, ասացին՝ ինչ-որ քար է գլորվել, վնասել այն խողովակը, որով թափոնները գնում են դեպի պոչամբար, այդ պատճառով էլ դրանք հայտնվել են գետում: Իսկ հիմա դեռևս տեղեկություն չունենք, թե ինչն է պատճառը, որ գետն աղտոտվում է», – ասում է Ղարագյոզյանը՝ շեշտելով, որ նման դեպքերը պարբերական բնույթ են կրում:
«Ամեն անգամ մի պատճառաբանություն են բերում: Մի անգամ ասում են բնական աղետ է, մի անգամ՝ արհեստական, իրենք մեղավոր չեն: Ամեն անգամ փորձում են խնդիրը տարբեր գործոնների հետ կապել», հավելում է մեր զրուցակիցը:
Ի դեպ, հիշեցնենք, որ նախորդ տարի ևս ահազանգ էր հնչել, որ կոմբինատի Ճոճկան և Մեծ Այրում համայնքների միջև գործող հին պոչամբարը վտանգ է ներկայացնում շրջակա միջավայրի ու բնակչության համար. պոչանքները տարբեր ճանապարհներով լցվում էին Դեբեդ գետը՝ վերացնելով գետի բուսականությունն ու կենդանատեսակները:
Կարդացեք նաև
Բացի գետի բուսական և կենդանական տեսակների վերացման խնդիրը, Ղարագյոզյանը հիշեցնում է՝ Դեբեդի ջուրն օգտագործում են ոռոգման նպատակներով: «Ջուրը պոմպերով Դեբեդից մղում են դեպի համայնքներ: Դեբեդի աջ և ձախ ափերին գտնվող համայնքների գյուղատնտեսական հողերը, այգիները հիմնականում ոռոգում են գետի ջրով», – ասում է Ախթալա համայնքի բնակիչը:
☢️ Ախթալայի հատվածում դենղնադարչնագույն աղտոտված ջրերը լցվում են Դեբեդ գետը, 13․06․2019։ Արդեն որերորդ ահազանգն է այս և մյուս հանքարդյունաբերական տարածքներից, սակայն դեռևս զրո արդյունք։ Հանք շահագործող ընկերությունները ցավոք մնում են օրենքից դուրս նաև հետհեղափոխական Հայաստանում։⚠️ Նշենք, որ Դեբեդ գետի այս հատվածից ներքև պոմպերով ջուր է մղվում գյուղատնտեսական հողերը ոռոգելու նպատակով, և այդ ջրերով աճեցված մթերքը կարող է հայտնվել ցանկացած մեկի սեղանին։ Իսկ ոմանք դեռ խոսում են նոր մետաղական հանքեր շահագործելու մասին։Տեսանյութերը Կամո Ղարագոզյանի էջից։Nikol Pashinyan / Նիկոլ Փաշինյան Վարագ Սիսեռեան Բնապահպանության և ընդերքի տեսչական մարմին ՀՀ շրջակա միջավայրի նախարարություն Ministry of Environment of Armenia
Gepostet von Հայկական բնապահպանական ճակատ / Armenian Environmental Front am Mittwoch, 12. Juni 2019
Խնդրի հետ կապված «Փաստը» զանգահարեց նաև Ախթալա համայնքի ղեկավար Արկադի Թամազյանին՝ ճշտելու, թե արդյոք համայնքապետարանում տեղյա՞կ են խնդրին: Թամազյանը նշեց, որ բնակիչներից խնդրի հետ կապված որևէ ահազանգ չեն ստացել: Հարցին՝ իսկ նախկինում նման դեպքեր եղե՞լ են, համայնքի ղեկավարը դրական պատասխան տվեց. «Նախկինում, եթե դեպքեր եղել էլ են, վերացվել են: Իսկ այս դեպքի հետ կապված բնակիչները չեն դիմել մեզ», – եզրափակեց մեր զրուցակիցը:
ԼՈՒՍԻՆԵ ԱՌԱՔԵԼՅԱՆ
Հոդվածն ամբողջությամբ՝ «Փաստ» օրաթերթի այսօրվա համարում