Լրահոս
Օրվա լրահոսը

Բացառիկ հնարավորություն երիտասարդ աստղագետների համար

Հոկտեմբեր 03,2013 15:20

Այսօր «Արմենպրես» լրատվական գործակալության մամուլի սրահում տեղի ունեցավ ասուլիս` Միջազգային աստղագիտական միության (ՄԱՄ)` Երևանում կայանալիք գիտաժողովի վերաբերյալ:

Ողջունելով ներկաներին` ՄԱՄ միջազգային գիտական կազմկոմիտեի համանախագահ, տեղական կազմկոմիտեի նախագահ Արեգ Միքայելյանը հայտնեց, որ հոկտեմբերի 7-11-ը Երևանում կայանալու է Միջազգային աստղագիտական միության գիտաժողովը, որին մասնակցելու են ավելի քան 165 գիտնականներ աշխարհի 35 երկրներից, ինչը, նրա խոսքերով, ռեկորդային ցուցանիշ է Հայաստանում երբևէ անցկացված գիտական միջոցառումների ողջ պատմության մեջ. «Գրեթե նման քանակի երկրներ ներկայացված են եղել նաև 2007 թ. կայացած Եվրոպական աստղագիտական համագումարում: Այս գիտաժողովը, որը 304-րդն է, նվիրված է հայ անվանի աստղագետ Բենիամին Մարգարյանի 100-ամյակին և անցկացվում է «Ակտիվ գալակտիկական միջուկների բազմալիքային շրջագայություններ և ուսումնասիրություններ» թեմայով»,- ասաց Արեգ Միքայելյանը և նկատեց, որ սա երիտասարդ աստղագետների համար բացառիկ հնարավորություն է` շփվելու ավագ սերնդի աստղագետների հետ:

Կազմկոմիտեի անդամ Հարություն Ծատրյանն ասաց, որ գիտաժողովին առավել շատ մասնակիցներ կլինեն զարգացած աստղագիտական երկրներից` ԱՄՆ-ից, Գերմանիայից, Իտալիայից, Ֆրանսիայից, Իսպանիայից, Մեծ Բրիտանիայից, Ճապոնիայից, Չինաստանից, Հնդկաստանից, Կանադայից, Ավստրալիայից, Ռուսաստանից, Ուկրաինայից, ինչպես նաև Հայաստանից:

Նշենք, որ միջոցառմանը ներկայացված են նաև Արգենտինան, Բրազիլիան, Կոլումբիան, Բուլղարիան, Թայվանը, Իռլանդիան, Իրանը, Լեհաստանը, Հոլանդիան, Հունաստանը, Ղազախստանը, Մալազիան, Մեքսիկան և այլ երկրներ: Արեգ Միքայելյանի փոխանցմամբ` հինգ մայրցամաքներից էլ մասնակիցներ կան, որոնց թվում են նաև միջազգային կազմակերպությունների և գիտական ծրագրերի ղեկավարներ, աստղադիտարանների և աստղագիտական ինստիտուտների տնօրեններ, ինչպես նաև բազմաթիվ երիտասարդ աստղագետներ: Կներկայացվեն մոտ 60 բանավոր զեկուցումներ և շուրջ 100 պոստերներ:

Կազմկոմիտեի անդամ Սոնա Ֆարմանյանը հայտնեց, որ գիտաժողովի կազմակերպչական աշխատանքներում ներգրավված են նաև ուսանողական խմբեր: Նա մասնավորապես ասաց. «Ընդգրկված են մոտ երեսուն ուսանողներ ԵՊՀ Ֆիզիկայի, Միջազգային հարաբերությունների, Ռոմանագերմանական բանասիրության, Արևելագիտության և Ժուռնալիստիկայի ֆակուլտետներից, ինչպես նաև Վ. Բրյուսովի անվան պետական լեզվաբանական համալսարանից և Հայկական տուրիզմի ինստիտուտից»:

Կազմկոմիտեի անդամներից Լիլիթ Սարիբեկյանն էլ տեղեկացրեց, որ գիտաժողովի մասնակիցների հետ պատրաստվում են այցելել նաև Էջմիածին, Գառնի, Գեղարդ, Նորավանք, Բյուրականի աստղադիտարան, Էրեբունի թանգարան, Մատենադարան, Ազգային պատկերասրահ և այլն:

Հայաստանում նման գիտաժողովներ են անցկացվել 1966, 1986, 1989, 1998 և 2001թթ.: 2013-ին անցկացվելիք գիտաժողովը կլինի 6-րդը:

Սիրանուշ ՀԱՅՐԱՊԵՏՅԱՆ

Համաձայն «Հեղինակային իրավունքի եւ հարակից իրավունքների մասին» օրենքի՝ լրատվական նյութերից քաղվածքների վերարտադրումը չպետք է բացահայտի լրատվական նյութի էական մասը: Կայքում լրատվական նյութերից քաղվածքներ վերարտադրելիս քաղվածքի վերնագրում լրատվական միջոցի անվանման նշումը պարտադիր է, նաեւ պարտադիր է կայքի ակտիվ հղումի տեղադրումը:

Մեկնաբանություններ (0)

Պատասխանել

Օրացույց
Հոկտեմբեր 2013
Երկ Երե Չոր Հնգ Ուրբ Շաբ Կիր
« Սեպ   Նոյ »
 123456
78910111213
14151617181920
21222324252627
28293031