Գերագույն խորհրդի 1990– 95թթ. պատգամավոր Ռաֆիկ Ղազինյանը երդվյալ դաշնակցական է։ Նա ԱԺ ընտրություններին առաջադրվել է ՀՅԴ ռեյտինգային ընտրակարգով՝ Լոռու մարզի Թումանյանի տարածաշրջանում։
«Ինչո՞ւ 1995թ. հետո չմասնակցեցիք ԱԺ ընտրություններին, չցանկացաք կրկին ընտրվել ԱԺ պատգամավոր»,- հետաքրքրվեցինք զրուցակցից։ «1995 թվականից հետո ԱԺ պատգամավոր ընտրվելը դարձավ ոչ թե գաղափարի խնդիր, այլ՝ հանուն սեփական բիզնեսը պաշտպանելու խնդիր։ Իսկ ես բիզնես չունեի։ Երբ 1990-95թթ. մենք հայրենիք էինք ստեղծում, ուրիշները՝ փող եւ ունեցվածք»,- արձագանքեց Ռաֆիկ Ղազինյանը։
Գերագույն խորհրդի պատգամավորին հիշեցրինք, որ ՀՅԴ-ն էլ հավատարիմ չմնաց իր սկզբունքներին, թե՛ Ռոբերտ Քոչարյանի, թե՛ Սերժ Սարգսյանի օրոք, հանուն իշխանության մեջ տեղ ունենալու, դիմեց գործարքների, նրա տարբեր ներկայացուցիչներ պաշտոններ ստացան, այսօր էլ կոալիցիա են կազմել ՀՀԿ-ի հետ։
«Իմ կարծիքով՝ ՀՅԴ-ն հավատարիմ է մնացել իր սկզբունքներին։ Իմ ընկերները հավատարիմ են մնացել։ Երբ Արցախին վտանգ է սպառնում, ես չեմ հիշում, որ որեւէ այլ կուսակցություն իմ մարտական ընկերների կողքին լինի։ Միայն ՀՅԴ-ն է լինում նրանց կողքին։ Օրինակ՝ Հրանտ Մարգարյանի զույգ որդիներն անցյալ տարվա ապրիլին մասնակցում էին մարտական գործողություններին։ Իսկ նրանց նորածին երեխաներն ընդամենը մի քանի օրական էին։ Ես չեմ հիշում, որ Արցախին վերաբերող որեւէ հարց լինի, եւ արտերկրում ապրող մարդիկ՝ իրենց ունեցած կապերով, չհետապնդեն Արցախի ժողովրդի իրավունքները։ Ես նկատի ունեմ նաեւ անցյալ տարվա ապրիլյան պատերազմի ժամանակ ունեցած դիրքորոշումը»,- ասաց զրուցակիցը։
Թագուհի ՀԱԿՈԲՅԱՆ
Հոդվածն ամբողջությամբ կարող եք կարդալ «Հրապարակ» թերթի այսօրվա համարում