Գիտությունների ազգային ակադեմիայում երեկ նշվեց Գիտության համաշխարհային օրը, ինչը եւս մեկ առիթ է` ընդգծելու գիտության կարևոր դերը մարդկության կյանքում: Այս տարի Գիտության համաշխարհային օրվա թեման է՝ «Հիմնարար գիտությունները հանուն կայուն զարգացման»:
ՀՀ ԳԱԱ նախագահության շենքում Երիտասարդ գիտնականների միավորումը կազմակերպել էր գիտափորձեր, փորձանմուշների, պաստառների, լուսանկարների ցուցադրություններ՝ բարձր դասարանների աշակերտների և ուսանողների համար:
Որպես երիտասարդ գիտնական` Ֆիզիկական հետազոտությունների ինստիտուտը ներկայացրեց Վարդգես Ավագյանը: Նա ստեղծել էր մի սարք, որը լույսի օգնությամբ ձայնի կամ ինֆորմացիայի փոխանցում էր իրականացնում:
Նա ասաց, որ այդ մեթոդով ռազմական գաղտնալսման համակարգերն են աշխատում, ինտերնետային կապի հաղորդում է տեղի ունենում և այլն:
Կարդացեք նաև
Էկոկենտրոնի սննդի շղթայի ռիսկերի գնահատման տեղեկատվական վերլուծական կենտրոնի փորձագետ Մոնիկան նշեց, որ զբաղվում է սննդակարգային հետազոտություններով: Ներկայացված սարքերից առանձնացրեց «Խելացի կշեռքը», որը, փաստորեն, «BORK» հավելվածի միջոցով ցույց է տալիս իր վրա դրված մթերքի քաշին համապատասխան կիլոկալորիաների, ածխաջրերի, ճարպերի քանակը:
Քիմիական ֆիզիկայի ինստիտուտի ներկայացուցիչը Ստեփանյան Սամվելն էր: Ցուցասեղանին ցուցադրել էին հենց իրենց արտադրանքը՝ տիտանի հիմքով իմպլանտները, որոնք, ինչպես նշեց Սամվելը, չնայած նրան, որ նորաստեղծ են, արդեն հասցրել են օգնել 44-օրյա պատերազմում տուժած զինվորներին` վերականգնելով ոսկորների աշխատանքը: Դրանք բացառապես անվտանգ են, կենսաբանորեն համատեղելի են, չեն առաջացնում ալերգիաներ և ընթացքում դառնում են ոսկորի մաս:
Հաջորդը «Ժանգի ձևափոխիչն» էր, այն ամբողջությամբ մաքրում է երկաթի ժանգային մասը և թույլ չի տալիս կրկին ժանգոտվել` անգամ տարիներ հետո:
Գառնիկ Մուրադյանը նույն ինստիտուտից էր, ներկայացնում էր դժվարահալ մետաղների ավանդական եղանակներին փոխարինող նոր եղանակները և զուգահեռ ցուցադրում էր այդ եղանակով պատրաստված նմուշները: Նշում էր, որ այս եղանակի շնորհիվ կարողանում են եւ ´ ժամանակ խնայել, եւ քիչ ծախս կատարել:
Զրուցեցինք նաև ԳԱԱ Գիտակրթական միջազգային կենտրոնի ուսանողական գիտական ընկերության փոխնախագահ Հռիփսիմե Խաչատրյանի հետ, որը ներկայացրեց ՀՀ ԳԱԱ-ի առավելությունները, ուսանողներին ընձեռված մեծ հնարավորությունները, արդեն իսկ ունեցած ձեռքբերումները:
«Այստեղ ժամանակը անկասելի առաջ է շարժվում, և մեզանից յուրաքանչյուրը այս ընթացքում կհասցնի անել իր բաժին բարի գործը ու, քանի որ մենք կոչված ենք ծառայելու կրթությանը, գիտությանը` փորձում ենք մեր ներդնումն ունենալ և գիտության քարտեզում նշմարել մեր անունը: Այստեղ «նշմարել անունը» միայն մեր անուն ազգանունով չի որոշվում, այլ այն հաստատության,ո րը ավարտել ենք»,-ասաց Հռիփսիմե Խաչատրյանը:
Նատալի ՄԻՆԱՍՅԱՆ
