ԱԺ «Ծառուկյան» խմբակցության պատգամավորները խուսափում են ՀՀ երկրորդ նախագահ Ռոբերտ Քոչարյանի հանդեպ կալանքի միջնորդության մասին քաղաքական գնահատականներ հնչեցնել։ 
Քիչ առաջ լրագրողների հետ զրույցում խմբակցության անդամ Նաիրա Զոհրաբյանը նշեց, որ հարցն իրավական տիրույթում է եւ իրենք քաղաքական մեկնաբանություններ չեն տալու։
«Ծառուկյան» խմբակցության պատգամավոր Սերգեյ Բագրատյանն էլ հայտարարեց, որ օրենքի առաջ բոլորը հավասար են։ Նրա խոսքով՝ հայաստանյան թավշյա հեղափոխության սկզբունքներից մեկն այն է, որ պետք է արդարություն հաստատվի։
Ըստ Բագրատյանի՝ երբ Ռոբերտ Քոչարյանի հետ կապված իրավական գործընթացները կավարտվեն, այդ ժամանակ խմբակցությունը կքննարկի քաղաքական հայտարարություն անելու հարցը։
Լուիզա ՍՈՒՔԻԱՍՅԱՆ
