Լրահոս
Օրվա լրահոսը

Արվեստագետ Թուրքիայից. «Հայաստանի մշակույթի մասին իմ պատկերացումները միշտ ասոցացրել եմ Փարաջանովի հետ»

Սեպտեմբեր 01,2014 15:40

Այսօր «Մեդիա» կենտրոնում տեղի ունեցավ «Նկարիչների փոխայցելություններ» նախագծի մեկնարկին նվիրված մամլո ասուլիսը: Նախագիծն իրականացնում են Հանրային լրագրության ակումբ և Անադոլու Քուլթուր հասարակական կազմակերպությունները «Աջակցություն Հայաստան-Թուրքիա կարգավորման գործընթացին» ծրագրի շրջանակներում:

Հանրային լրագրության ակումբի ղեկավար Սեդա Մուրադյանն իր խոսքում նշեց, որ մշակույթը եւ արվեստը կարող են դառնալ այն լեզուն, որը կնպաստի երկու հարեւան պետությունների ինքնաճանաչմանը, երկխոսության ստեղծմանը: Նա ներկայացրեց, որ սա առաջին նախագիծն է, որում ընդգրկված են երիտասարդ նկարիչներ երկու երկրներից: Թուրքիայից ներկայացած չորս երիտասարդ արվեստագետները իրենց խմբի ղեկավար Սերդար Յըլմազի հետ յոթ օր լինելու են Հայաստանում: Ծրագրի շրջանակներում լինելու են ցուցահանդեսներ, ինտերակտիվ գործնական հանդիպումներ, համատեղ բացօթյա արվեստանոցներ: Ծրագրի մասնակիցները կայցելեն նաեւ թանգարաններ, արվեստի դպրոցներ եւ պատկերասրահներ: Ծրագրի Հայաստանյան այցելության շրջանակներում նախատեսվում է նաեւ Թուրքիայի եւ Հայաստանի գեղանկարիչների համատեղ պատկերազարդում Երեւանյան պատերից մեկի վրա:

Հայաստանի նկարիչների չորսհոգանոց երիտասարդ արվեստագետների խմբի ղեկավար Գագիկ Չարչյանը նշեց, որ մինչ նախագծի մեկնարկը ծանոթ է եղել թուրքական մշակույթին, այնտեղի արվեստում տիրող իրավիճակին: «Գիտեի, որ Թուրքիայում կան գործող շատ լավ արվեստագետներ»,- ասաց նա:

Թուրքական խմբի ղեկավար Սերդար Յիլմազն էլ նշեց. «Շատ երկար տարիներ առաջ, երբ ես այցելեցի Արեւելք՝ պարզապես ճամփորդության, այնտեղ ինձ համար արդեն հասկանալի էր ամեն ինչ: Շատ կուզեի Հայաստան գալ, բայց սահմանները փակ էին: Հայաստանի մշակույթի մասին իմ պատկերացումները միշտ ասոցացրել եմ Փարաջանովի հետ, որովհետեւ շատ եմ սիրել ֆիլմերը, դիտել եմ «Նռան գույն»-ից սկսած մնացած ֆիլմերը: Արեւելք ճանապարհորդությանս ժամանակ, երբ հատկապես Աղթամարի Սուրբ Խաչ եկեղեցի այցելեցի, այնտեղի ճարտարապետությունը, շենքի եւ փողոցների ճարտարապետությունը, ինձ մոտ շատ կարճ ժամանակ հետո ընկալվեց որպես հայկական: Ես հասկացա, որ հայկականը հենց սա է եւ դրա համար աննկարագրելի ոգեւորվածությամբ եւ հուզմունքով եմ այստեղ գտնվում եւ ավելի մոտից շփվում այն ամենի հետ, ինչը ես տեսել եմ Արեւելքում»:

Դիտարկմանը, թե ինչ կարելի է անել, որ փակ սահմանները չխոչընդոտեն երկու երկրների հարաբերությունների ստեղծմանը, հայկական խմբի ղեկավար Գագիկ Չարչյանը պատասխանեց, որ սահմանները միայն աշխարհագրական չեն, դրանք կան նաեւ երկու հանրությունների մեջ: Եվ այսօր կազմակերպվող միջոցառումները նպատակ ունեն դրանք կոտրելու: «Այստեղ օգնություն է գալիս արվեստը»,- ասում է նա եւ նշում, այսօրվա արժեքներ ստեղծողները երիտասարդներն են ՝ համալսարանականները: Թուրքական խմբի ղեկավարն էլ իր հերթին նշեց, որ սահմանն արդեն բացվել է՝ եւ ինքը իր չորս ուսանողների հետ արդեն Հայաստանում է: Հիշեցնենք, որ «Նկարիչների փոխայցելություններ» նախագիծը տեղի է ունենում «Աջակցություն Հայաստան-Թուրքիա կարգավորման գործընթաց» ծրագրի շրջանակներում: Ծրագիրը իրականացվում է Եվրոպական միության ֆինանսական աջակցությամբ «Կայունության գործիքի» շրջանակներում: Նպատակն է աջակցել քաղաքացիական հասարակության ջանքերին՝ ուղղված մշակութային և կրթական ծրագրերի միջոցով Հայաստան-Թուրքիա հարաբերությունների կարգավորմանն ու փակ սահմանների բացմանը:

«Նկարիչների փոխայցելություններ» նախագծի ավարտին լավագույն գործերը տպագրվելու են 2015 թվականի օրացույցում:

Հռիփսիմե ՀՈՎՀԱՆՆԻՍՅԱՆ

Համաձայն «Հեղինակային իրավունքի եւ հարակից իրավունքների մասին» օրենքի՝ լրատվական նյութերից քաղվածքների վերարտադրումը չպետք է բացահայտի լրատվական նյութի էական մասը: Կայքում լրատվական նյութերից քաղվածքներ վերարտադրելիս քաղվածքի վերնագրում լրատվական միջոցի անվանման նշումը պարտադիր է, նաեւ պարտադիր է կայքի ակտիվ հղումի տեղադրումը:

Մեկնաբանություններ (0)

Պատասխանել

Օրացույց
Սեպտեմբեր 2014
Երկ Երե Չոր Հնգ Ուրբ Շաբ Կիր
« Օգո   Հոկ »
1234567
891011121314
15161718192021
22232425262728
2930